തിരുവനന്തപുരം:രാഹുല് മാങ്കൂട്ടത്തില് എം എല് എയ്ക്കെതിരെ പരാതി നല്കിയ യുവതിയെ തിരിച്ചറിയാന് കഴിയും വിധം വീഡിയോ പുറത്തിറക്കിയതിന് സൈബര് പൊലീസ് അറസ്റ്റ് ചെയ്ത രാഹുല് ഈശ്വറിനെ മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഉച്ചയ്ക്ക് മെഡിക്കല് കോളേജ് ആശുപത്രിയില് എത്തിച്ച് പ്രാഥമിക ചികിത്സ നല്കി ജയിലിലേക്ക് കൊണ്ടുപോകാന് ആയിരുന്നു ഉദ്ദേശിച്ചിരുന്നതെങ്കിലും ആരോഗ്യനില മോശമായതിനെ തുടര്ന്ന് അഡ്മിറ്റ് ചെയ്യാന് ഡോക്ടര്മാര് നിര്ദ്ദേശിക്കുകയായിരുന്നു.
റിമാന്ഡ് ചെയ്തതിനെ തുടര്ന്ന് ജയിലില് നിരാഹാര സമരത്തിലാണ് രാഹുല് ഈശ്വര്. നേരത്തേ രാഹുല് ഈശ്വറിനെ പൂജപ്പുര ജയിലിലേക്ക് മാറ്റിയിരുന്നെങ്കിലും ജയിലില് നിരാഹാരം പ്രഖ്യാപിച്ചതോടെ സെന്ട്രല് ജയിലിലേക്ക് മാറ്റുകയായിരുന്നു.
അതിനിടെ, രാഹുല് ഈശ്വര് നല്കിയ ജാമ്യഹര്ജിയില് ശനിയാഴ്ചയും വാദം തുടരും. ഇരുവിഭാഗത്തിന്റെയും വാദം പൂര്ത്തിയാകാത്ത സാഹചര്യത്തിലാണ് തിരുവനന്തപുരം അഡീഷണല് സിജെഎം കോടതി ശനിയാഴ്ച പരിഗണിക്കാന് മാറ്റിയത്. കേസിലെ എഫ് ഐ ആര് വായിക്കുക മാത്രമാണ് വീഡിയോയില് ചെയ്തതെന്നും പരാതിക്കാരെ അവഹേളിക്കുന്ന ഒന്നും ഇതില് ഇല്ലെന്നും രാഹുല് ഈശ്വറിന് വേണ്ടി അഭിഭാഷകന് വാദിച്ചു. രാഹുല് അന്വേഷണവുമായി സഹകരിക്കുന്നില്ലെന്നും വീണ്ടും കസ്റ്റിയില് ചോദ്യം ചെയ്യണമെന്നും പ്രോസിക്യൂഷനും വാദിച്ചു.
