കോട്ടയം : ശബരിമലയുമായി ബന്ധപ്പെട്ട് 500 കോടിയുടെ അന്താരാഷ്ട്ര കൊള്ളയെന്ന് രമേശ് ചെന്നിത്തല. മോഷ്ടിച്ച സ്വര്ണം പുരാവസ്തു എന്ന പേരില് അന്താരാഷ്ട്ര മാര്ക്കറ്റില് വിറ്റതായും വിവരം ലഭിച്ചതായി അദ്ദേഹം പറഞ്ഞു.
ഒരു വ്യവസായിയില് നിന്നാണ് ഈ വിവരങ്ങള് ലഭിച്ചത്. ഈ വ്യക്തിയുടെ പേര് വെളിപ്പെടുത്തില്ല. എന്നാല് എസ്ഐടിക്ക് വിവരങ്ങള് നല്കാന് ഈ വ്യക്തി തയാറാണ്. കൂടുതല് അന്വേഷണം നടക്കുമ്പോള് വന് സ്രാവുകള് പുറത്തുവരും.
സ്വര്ണ കൊള്ളയില് പ്രതികളെ സംരക്ഷിക്കുന്ന നിലപാടാണ് സര്ക്കാരിന്റെത്. സിപിഎമ്മിലെ രണ്ടു നേതാക്കള് അറസ്റ്റിലായിട്ടും മുഖ്യമന്ത്രി മൗനം പാലിക്കുകയാണ്. ഇവര്ക്കെതിരേ അച്ചടക്ക നടപടി സ്വീകരിക്കാനും തയാറായിട്ടില്ല. അതിനാല് പാര്ട്ടി അറിഞ്ഞു നടത്തിയ കൊള്ളയാണോ എന്നു സംശയിക്കണം. അറസ്റ്റിലായ പത്മകുമാര് പലതും തുറന്നു പറഞ്ഞേക്കുമോ എന്ന ഭയം മൂലമാണ് പാര്ട്ടി നടപടി സ്വീകരിക്കാത്തതെന്നും രമേശ് ചെന്നിത്തല പറഞ്ഞു.
