ന്യൂദല്ഹി: അരുന്ധതി റോയിയുടെ ‘മദര് മേരി കംസ് ടു മി’ എന്ന പുസ്തകത്തിന്റെ കവറില് ബീഡി വലിക്കുന്നതായി കാണിച്ചതിനെതിരെയുള്ള പൊതുതാല്പ്പര്യ ഹര്ജി തള്ളിയ കേരള ഹൈക്കോടതി ഉത്തരവിനെതിരായ അപ്പീല് പരിഗണിക്കാതെ സുപ്രീംകോടതി. പുസ്തകത്തിന്റെ പുറംചട്ടയുടെ പിന്നില് പുകയില ഉപയോഗത്തെ അംഗീകരിക്കുന്നില്ലെന്ന് പ്രസാധകര് വ്യക്തമാക്കിയിട്ടുണ്ടെന്ന് ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ ബെഞ്ച് നിരീക്ഷിച്ചു.
അരുന്ധതി റോയ് ഒരു പ്രമുഖ എഴുത്തുകാരിയാണെന്നും അവരുടെ സാഹിത്യവും പുകവലി പ്രോത്സാഹിപ്പിക്കുന്നില്ലെന്നു ചൂണ്ടിക്കാട്ടിയ ചീഫ് ജസ്റ്റിസ്, പബ്ലിസിറ്റിക്ക് വേണ്ടിയാണോ ഹര്ജി സമര്പ്പിച്ചതെന്ന് ചോദിച്ചു.
നല്ല സാഹിത്യം വായിക്കുന്ന ഒരാള് ഫോട്ടോ മാത്രം നോക്കി പുസ്തകം വാങ്ങില്ല, മറിച്ച് രചയിതാവിന്റെ വിശ്വാസ്യതയും പുസ്തകത്തിന്റെ ഉള്ളടക്കവും കണക്കിലെടുത്താണ് പുസ്തകം വാങ്ങുന്നതെന്ന് ചീഫ് ജസ്റ്റിസ് സൂര്യകാന്ത് അഭിപ്രായപ്പെട്ടു.
