തിരുവനന്തപുരം: അന്താരാഷ്ട്ര വിമാനത്താവളത്തിനും ആഭ്യന്തര വിമാനത്താവളത്തിനും ഭീഷണിയാവുകയാണ് ആകാശത്ത് വട്ടമിട്ടു പറക്കുന്ന പക്ഷികള്. വിമാനത്താവളത്തിന് സമീപമുള്ള മാലിന്യങ്ങളില് ഇരതേടി എത്തുന്ന പക്ഷികളാണ് വിമാനങ്ങള്ക്ക് അപകടക്കെണിയൊരുക്കുന്നത്. അന്താരാഷ്ട്ര തലത്തില് മികച്ച വിവിധ വിമാനങ്ങള് ഇവിടെ ലാന്ഡ് ചെയ്യാത്തതിന് പിന്നിലെ കാരണങ്ങളിലൊന്ന് ഇത്തരം പ്രശ്നങ്ങളാണ്.
ഈ പ്രദേശത്ത് മാലിന്യം വലിച്ചെറിയുന്നതിന് അടുത്തിടെ കുറച്ചുകുറവു വന്നിട്ടുണ്ടെങ്കിലും പരുന്തുകളുടെ ശല്യം കുറയുന്നില്ല. വിവിധതരത്തിലുള്ള മാലിന്യങ്ങളാണ് പരുന്തുകള് ഉള്പ്പെടെയുള്ള പക്ഷികളെ ആകര്ഷിക്കുന്നത്. സമീപ പ്രദേശത്തെ അനധികൃത അറവുശാലകളിലും മത്സ്യമാര്ക്കറ്റുകളിലും നിന്നുമുള്ള അവശിഷ്ടങ്ങള് വേണ്ടവിധം സംസ്ക്കരിക്കാതെ വലിച്ചെറിയുന്നതാണ് പക്ഷികളെ ആകര്ഷിക്കുന്നത്.
വിമാനത്താവളത്തിന് സമീപത്തെ വലിയ കെട്ടിടങ്ങളുടെ മുകളില് ഇരിപ്പുറപ്പിക്കുന്ന പരുന്തുകള് ഉള്പ്പെടെയുള്ള പക്ഷികള് ഇത്തരം അവശിഷ്ടങ്ങള് കൊത്തിക്കൊണ്ട് പറക്കുന്നത് പലപ്പോഴും വിമാനങ്ങള്ക്ക് ഭീഷണിയാവുകയാണ്. പക്ഷികള് വന്നിടിച്ചതുകാരണം പലപ്പോഴും വിമാനങ്ങളുടെ സുഗമമായ യാത്രയ്ക്ക് തടസം നേരിടുന്നുണ്ട്. പക്ഷികള് മൂലമുണ്ടാകുന്ന അപകടങ്ങള് തടയാന് വിമാനത്താവളം അധികൃതര് വലിയ തുകയാണ് ചെലവഴിക്കുന്നത്. ആകാശം സുരക്ഷിതമാക്കാന് പക്ഷികളെ ഭയപ്പെടുത്തി ഓടിക്കാന് വലിയശബ്ദം പുറപ്പെടുവിക്കുന്ന പടക്കങ്ങളും ആകാശത്തേക്ക് ഉയര്ന്നുപൊങ്ങി പൊട്ടിത്തെറിക്കുന്ന റോക്കറ്റുകളും ഉപയോഗിക്കുന്നു. ആകാശ നിരീക്ഷണത്തിനും പക്ഷികളെ വിരട്ടിയോടിക്കുന്നതിനും വലിയ മനുഷശക്തിയും പണവും ചെലവാക്കേണ്ടിവരുന്നു.
പ്രദേശത്തെ പല അറവുശാലകളും ലൈസന്സില്ലാതെ അനധികൃതമായിട്ടാണ് പ്രവര്ത്തിക്കുന്നത്. ഇവയ്ക്കെതിരെ അധികൃതരുടെ നടപടികള് ഉണ്ടാകാത്തതും മാലിന്യശേഖരം വര്ധിക്കാന് കാരണമാകുന്നു. ഇതിനെതിരെ കര്ശന നടപടികള് ഉണ്ടായാല് മാത്രമെ വിമാനങ്ങള്ക്ക് ഭീഷണിയാകുന്ന പക്ഷികളെയും നിയന്ത്രിക്കാനാവു.
