കാസര്കോഡ് : ഹോസ്ദുര്ഗ് കോടതി പരിസരത്ത് വന് പൊലീസ് സന്നാഹം.ഇതോടെ രാഹുല് മാങ്കൂട്ടത്തില് എം എല് എ പിടിയിലായെന്ന് കരുതി മാധ്യമങ്ങളും ജനക്കൂട്ടവും വ്യാഴാഴ്ച വൈകിട്ട് കോടതി പരിസരത്ത് തടിച്ചു കൂടി.
മാധ്യമങ്ങള് ലൈവ് നല്കാനും തുടങ്ങി.ഇതോടെ രാഹുല് മാങ്കൂട്ടത്തിലിനെതിരെ പ്രതിഷേധിക്കാന് തയാറെടുത്ത് ബി ജെ പി , ഡി വൈ എഫ് ഐ പ്രവര്ത്തകരും കൊടികളുമായെത്തി.തങ്ങളുടെ പൊതിച്ചോര് വിതരണത്തെ രാഹുല് മാങ്കൂട്ടത്തില് അപമാനിച്ചെന്നാരോപിച്ച് എം എല് എയ്ക്ക് നല്കാന് പൊതിച്ചോറുമായാണ് ഡി വൈ എഫ് ഐ പ്രവര്ത്തകര് എത്തിയത്.
എന്നാല് മാധ്യമങ്ങളുടെ ചോദ്യത്തിന് കൃത്യമായ മറുപടി നല്കാന് പൊലീസ് തയാറായില്ല.ഏറെ നേരം കഴിഞ്ഞ ശേഷം രാഹുല് പിടിയിലായിട്ടില്ലെന്നും എന്നാല് ഹോസ്ദുര്ഗ് കോടതിയില് അഭിഭാഷകന് മുഖേന കീഴടങ്ങുമെന്നുളള സൂചനകള് ലഭിച്ചെന്നും പൊലീസിന്റെ ഭാഗത്ത് നിന്ന് വിവരം കിട്ടി.ഇതിനിടെ പൊലീസ് സംഘം പിന്വാങ്ങുകയും ചെയ്തു.
രാഹുല് കര്ണാടകത്തിലേക്ക് കടന്നുവെന്നും കേരളത്തോടടുത്ത സുളള്യയിലുണ്ടെന്നും അഭ്യൂഹമുണ്ട്. മുന്കൂര് ജാമ്യ ഹര്ജി തളളുകയും കോണ്ഗ്രസില് നിന്ന് പുറത്താക്കുകയും ചെയ്തതോടെ രാഹുല് കീഴടങ്ങിയേക്കുമെന്നും പറയപ്പെടുന്നു.എന്നാല് എം എല് എ പിടിയിലായെന്നും പൊലീസ് വിവരം പുറത്തു വിടാത്തതാണെന്നും വാര്ത്തയുണ്ട്.
