കണ്ണൂര്: യുവമോര്ച്ച സംസ്ഥാന വൈസ് പ്രസിഡന്റായിരിക്കെ സിപിഎം അക്രമികള് ക്രൂരമായി വധിച്ച സ്വര്ഗീയ കെ.ടി. ജയകൃഷ്ണന് മാസ്റ്ററുടെ 26-ാം ബലിദാന വാര്ഷികം ഇന്ന്. പാനൂര് മൊകേരി ഈസ്റ്റ് എയുപി സ്കൂള് അദ്ധ്യാപകനായിരുന്ന കെ.ടി. ജയക്യഷ്ണന് മാസ്റ്ററെ 1999 ഡിസംബര് ഒന്നിന് രാവിലെ 10.40ന് മാര്ക്സിസ്റ്റ് അക്രമിസംഘം ക്ലാസ് മുറിക്കകത്ത് ഇരച്ചുകയറി വെട്ടിക്കൊലപ്പെടുത്തുകയായിരുന്നു. ആറാംതരം ബി ഡിവിഷനില് കണക്ക് ക്ലാസെടുക്കുകയായിരുന്നു അദ്ദേഹം.
ഇന്ന് രാവിലെ എട്ടിന് അദ്ദേഹത്തിന്റെ സ്മൃതിമണ്ഡപത്തില് പുഷ്പാര്ച്ചനയും ഒന്പതിന് പാനൂര് ശക്തിദുര്ഗ്ഗം കാര്യാലയത്തില് അനുസ്മരണ സാംഘിക്കും നടക്കും. ആര്എസ്എസ് ഉത്തരകേരളം പ്രാന്ത സമ്പര്ക്ക പ്രമുഖ് എന്.സി.ടി. രാജഗോപാല് അനുസ്മരണ പ്രഭാഷണം നടത്തും. യുവമോര്ച്ചയുടെ നേതൃത്വത്തില് വൈകിട്ട് നാലിന് പാനൂര് ടൗണില് സംഘടിപ്പിക്കുന്ന അനുസ്മരണ പൊതുസമ്മേളനത്തില് ബിജെപി സംസ്ഥാന ഉപാധ്യക്ഷന് അഡ്വ. ബി. ഗോപാലകൃഷ്ണന് പ്രസംഗിക്കും.
