കൊച്ചി : രാഹുല് ഈശ്വര് തനിക്കെതിരെയും വളരെ മോശമായി സാമൂഹ്യ മാധ്യമത്തില് പ്രതികരിച്ച ആളാണെന്ന് രാഹുല് മാങ്കൂട്ടത്തിലിനെതിരെ ആദ്യം വെളിപ്പെടുത്തലുമായി രംഗത്ത് വന്ന യുവനടി റിനി ആന് ജോര്ജ്. നിരന്തരം സ്ത്രീകളെ അധിക്ഷേപിക്കുന്ന ഇയാളെ വെറുതെ വിട്ടയയ്ക്കരുതെന്നും റിനി പ്രതികരിച്ചു. ലൈംഗിക അതിക്രമത്തിന് ഇരയായ സ്ത്രീകള് ഇനി പരാതിയുമായി മുന്നോട്ട് വരാതിരിക്കാനാണ് രാഹുല് ഈശ്വറിനെപ്പോലുള്ളവര് സൈബര് അധിക്ഷേപം നടത്തുന്നതെന്ന് നടി പറഞ്ഞു.
രാഹുല് മാങ്കൂട്ടത്തിലിനെതിരെ പരാതി നല്കിയ യുവതിയെ അധിക്ഷേപിച്ചെന്ന പരാതിയില് രാഹുല് മാങ്കൂട്ടത്തെ അറസ്റ്റ് ചെയ്ത പശ്ചാത്തലത്തിലാണ് റിനി ആന് ജോര്ജ് ഇങ്ങനെ പ്രതികരിച്ചത്.രാഹുല് ഈശ്വറിനെതിരെ താന് പരാതി നല്കിയിട്ടും ആ കേസില് ഒന്നും സംഭവിക്കാത്തതില് തനിക്ക് പ്രതിഷേധമുണ്ട്. അതിക്രമത്തിന് ഇരയായ സ്ത്രീകളെ തിരിച്ചറിയാന് പാകത്തില് വെളിപ്പെടുത്തല് പാടില്ലെന്ന നിയമം പോലും രാഹുല് ഈശ്വര് കാറ്റില്പ്പറത്തി. തന്നെ നിരന്തരം തേജോവധം ചെയ്ത അയാള് ഇപ്പോള് അതിക്രമത്തിന് ഇരയായ യുവതിയെ നിന്ദ്യവും ക്രൂരവുമായ രീതിയില് അധിക്ഷേപിക്കുന്നു.ഇതൊരു ചെറിയ വിഷയമല്ല.ഇയാളെ കസ്റ്റഡിയിലെടുത്ത് വിട്ടയ്ക്കുന്ന തരത്തില് നടപടി ചുരുങ്ങരുതെന്നും റിനി പറഞ്ഞു.
അതിക്രമത്തിന് ശേഷം ഒരുപാട് പ്രതിസന്ധികള് അതിജീവിച്ചാണ് പരാതിയുമായി ഇരകള് മുന്നോട്ടുവരുന്നത്.ചില സൈബര് ഗ്രൂപ്പുകളില് വ്യാപകമായ അധിക്ഷേപം നടക്കുന്നുണ്ട്.ഇനി സ്ത്രീകളില് ചിലരുടെ പരാതികള് വ്യാജമാണെങ്കില് തന്നെ അത് തീരുമാനിക്കേണ്ടത് കോടതിയാണെന്നും രാഹുല് ഈശ്വറല്ലെന്നും റിനി പ്രതികരിച്ചു.
