തിരുവനന്തപുരം: പോലീസ് ലുക്ക്ഔട്ട് സര്ക്കുലര് ഇറക്കിയ രാഹുല് മാങ്കൂട്ടത്തിലിനെ തത്ക്കാലം അറസ്റ്റ് ചെയ്യേണ്ടെന്ന് മുഖ്യമന്ത്രിയുടെ ഓഫീസ് നിര്ദേശിച്ചതായി സൂചന. പോലീസ് ആസ്ഥാനത്തിന്റെ കണ്വെട്ടത്ത് രാഹുല് എത്തിയിട്ടും അറസ്റ്റ് ചെയ്യാതെ വിട്ടത് പ്രത്യേക അജണ്ടയുടെ ഭാഗമാണെന്ന് കരുതുന്നു. ശബരിമല സ്വര്ണക്കൊള്ളയില് മുങ്ങിക്കുളിച്ച് നില്ക്കുന്ന സര്ക്കാരിന് തദ്ദേശ തെരഞ്ഞെടുപ്പ് വരെ വിഷയം ചര്ച്ച ചെയ്യാതിരിക്കുന്നതിനും കേസ് അട്ടിമറിക്കാനുമായി രാഹുലിനെതിരായ പീഡനക്കേസ് തുറുപ്പുചീട്ടാക്കണമെന്ന നിലപാടിലാണ് സിപിഎം.
രാഹുലിനെതിരെ മൂന്ന് മാസം മുമ്പേ സ്വമേധയാ പോലീസിന് കേസ് എടുക്കാമായിരുന്നെങ്കിലും കോണ്ഗ്രസ്-സിപിഎം ഒത്തുകളിയുടെ ഭാഗമായി ഒഴിവാക്കിയിരുന്നു. എസ്എഫ്ഐയെയും ഡിവൈഎഫ്ഐയെയും വിട്ട് സമര നാടകങ്ങളും സിപിഎം നടത്തി. എന്നാല് തെരഞ്ഞെടുപ്പ് കാലത്ത് ഇടിത്തീപോലെ വന്ന ശബരിമലക്കൊള്ള സര്ക്കാരിനെ പ്രതിസന്ധിയിലാക്കി.
സ്വര്ണക്കൊള്ളയില് മുന് എംഎല്എ ജയിലിലാവുകയും മുന്മന്ത്രിയെ ചോദ്യം ചെയ്തേക്കുമെന്നുമായപ്പോഴാണ് രാഹുല് മാങ്കൂട്ടത്തിലിനെ സര്ക്കാരും സിപിഎമ്മും ആയുധമാക്കുന്നത്. കോണ്ഗ്രസിന്റെ വായടപ്പിക്കാനും വിഷയം രാഹുലിലേക്ക് തിരിച്ചു വിടാനുമാകും. രാഹുലിനെ ഉടനെ അറസ്റ്റ് ചെയ്യാന് പാടില്ലെന്നും തെരഞ്ഞെടുപ്പ് വരെ നീട്ടിക്കൊണ്ടു പോകണമെന്നുമാണ് മുഖ്യമന്ത്രിയുടെ നിര്ദേശം.
കഴിഞ്ഞ ദിവസം ജാമ്യത്തിനായി വക്കാലത്ത് ഒപ്പിടാന് രാഹുല് തിരുവനന്തപുരത്ത് വന്നിരുന്നതായി അഭിഭാഷകര് വ്യക്തമാക്കിയിട്ടുണ്ട്. ഈ സമയം ശ്രദ്ധതിരിക്കാന് രാഹുല് പാലക്കാടുണ്ടെന്ന് പ്രചരിപ്പിക്കാനുള്ള പദ്ധതികളും പോലീസ് ആസൂത്രണം ചെയ്തിരുന്നു. പാലക്കാട് വിട്ടുപോകുന്നത് ജാമ്യത്തെ ബാധിക്കുമെന്നും അതിനാല് രാഹുല് അവിടെ ഒളിവിലാണെന്ന് അഭിഭാഷകര് പറഞ്ഞതായും സര്ക്കാര് വൃത്തങ്ങള് തന്നെ പ്രചാരണം നടത്തി.
ബുധനാഴ്ചയാണ് രാഹുലിന്റെ ജാമ്യഹര്ജി പരിഗണിക്കുന്നത്. അന്ന് സര്ക്കാര് അഭിഭാഷകനെ ഉപയോഗിച്ച് കേസ് വീണ്ടും മാറ്റിവയ്പിക്കാവുന്നതേയുള്ളൂ.
