മൂന്നാം കണ്ണു ചുഴന്നെടുത്ത, തിലെയ-
സ്സ്വാദേറെയുള്ളാരുനീര്-
ചോര്ത്തി,ച്ചേര്ത്തതിലേക്കുരുക്കി,
യൊഴുകുംപാകത്തിലായ് ശുദ്ധനെയ്
ചേര്ക്കുമ്പൊളിളകാതെകൈ,
ഇടറിടാതുള്ളും ദൃഢം ചേര്ന്നുനി-
ന്നാര്ക്കും ശക്തി ചുരത്തിടും
വ്രതമതാണേകാഗ്രനിഷ്ഠാധനം
(സ്വാമിക്ക് സമര്പ്പിക്കുന്നതെന്തും നിഷ്ഠകളും ക്രമങ്ങളും സര്വ്വവും യോഗ ക്രിയാ മാര്ഗ്ഗങ്ങള് കൂടിയാണ്. മൂന്നു കണ്ണുള്ള നാളികേരം അത്തരത്തിലൊരു പ്രതീകമാണ്. കാഴ്ച്ചയിലൂടെ മനശ്ചാഞ്ചല്യമുണ്ടാകാതെ നോക്കണം. അത് തുരന്ന് മാധുര്യമൊഴുക്കിക്കളയണം. പകരം നെയ് നിറയ്ക്കണം, ഉള്ള് തപിപ്പിക്കണം, കട്ടപിടിച്ച നെയ് ഉരുക്കി ഒഴുക്കാന്
പാകത്തിലാക്കി, കൈവിറയ്ക്കാതെ, തൂവിപ്പോകാതെ ചെറിയ ദ്വാരത്തിലൂടെ ഉള്ളിലിറക്കണം. ആ ഏകാഗ്ര നിഷ്ഠയാണ് മണ്ഡലകാലം പഠിപ്പിക്കുന്ന ചിട്ടകളും വട്ടങ്ങളും. അതുതന്നെയാണ് ഭക്തന്റെ പ്രത്യക്ഷത്തിലാകുന്ന ധനം.)
