തിരുവനന്തപുരം: ബലാത്സംഗ കേസിൽ ആരോപണം ഉന്നയിച്ച യുവതിയുമായി ലൈംഗിക ബന്ധത്തിൽ ഏർപെട്ടതായി സമ്മതിച്ച് രാഹുൽ മാങ്കൂട്ടത്തിൽ എംഎൽഎ. തിരുവനന്തപുരം ജില്ലാ കോടതിയിൽ നൽകിയ ജാമ്യ ഹര്ജിയില് യുവതിയുമായി ദീര്ഘകാലമായി സൗഹൃദ ബന്ധമുണ്ടെന്നും രാഹുൽ വ്യക്തമാക്കി. യുവതിയുമായി പരിചയം ഫേസ്ബുക്കിലൂടെയാണെന്ന് ഹർജിയിൽ പറഞ്ഞു. രാഹുലിന്റെ മുന്കൂര് ജാമ്യഹര്ജി കോടതി തിങ്കളാഴ്ച പരിഗണിച്ചേക്കും.
ഗാര്ഹിക പീഡനത്തിന് ഇരയാകുന്നുവെന്ന് പരാതിക്കാരി തന്നോട് പറഞ്ഞു. തനിക്ക് അവരോട് സഹതാപം തോന്നി. തുടര്ന്ന് ഉഭയകക്ഷി സമ്മതപ്രകാരമുളള ലൈംഗിക ബന്ധത്തിലേക്ക് അത് വളര്ന്നു. ബന്ധത്തിലെ ശരിയും തെറ്റും തിരിച്ചറിയുന്നയാളാണ് യുവതി.
താന് കാരണം ഗര്ഭിണിയായെന്ന് പറയുന്നത് തെറ്റാണ്. താന് ഗര്ഭിണിയാക്കിയിട്ടില്ല. ഗര്ഭം അലസിപ്പിക്കാന് യുവതി സ്വയം മരുന്ന് കഴിച്ചതാണ്. അതിനാല് താന് എങ്ങനെയാണ് പ്രതിയാവുകയെന്നും ഹര്ജിയില് ചോദിക്കുന്നു. ബന്ധമുണ്ടായിരുന്ന സമയത്തെ വാട്സാപ്പ് ചാറ്റുകളടക്കം യുവതി സൂക്ഷിച്ചു. ഇത് രാഷ്ട്രീയ ഗൂഢാലോചനയുടെ ഭാഗമാണ്.
അതിനിടെ, കേസ് അന്വേഷിക്കാൻ പ്രത്യേക സംഘത്തെ രൂപീകരിക്കാൻ തീരുമാനമായി. തിരുവനന്തപുരം സിറ്റി പോലീസ് കമ്മീഷണർ തോംസൺ ജോസ് ആയിരിക്കും ഈ അന്വേഷണ സംഘത്തിന് നേതൃത്വം നൽകുക. ഡി.സി.പിയും ഒരു അസിസ്റ്റന്റ് കമ്മീഷണറും ഉൾപ്പെടുന്നതാകും സംഘം. ഇതുസംബന്ധിച്ച ഉത്തരവ് വൈകുന്നേരം ഇറങ്ങുമെന്നാണ് വിവരം. തിരുവനന്തപുരം റൂറൽ മേഖലയിലാണ് എഫ്.ഐ.ആർ. രജിസ്റ്റർ ചെയ്തതെങ്കിലും, കുറ്റകൃത്യം നടന്നത് സിറ്റി പോലീസ് കമ്മീഷണറുടെ പരിധിയിലുള്ള നേമം സ്റ്റേഷൻ പരിധിയിലായതിനാൽ എഫ്.ഐ.ആർ അങ്ങോട്ട് കൈമാറിയിട്ടുണ്ട്. നേമം സ്റ്റേഷനിലെ ഉദ്യോഗസ്ഥരാണ് യുവതിയുടെ രഹസ്യമൊഴിയും രേഖപ്പെടുത്തിയിരിക്കുന്നത്.
