ന്യൂദല്‍ഹി: 44-ാമത് അന്താരാഷ്ട്ര വ്യാപാര മേളയ്‌ക്ക് സമാപനം. ഭാരത മണ്ഡപത്തില്‍ നടന്ന മേള രാജ്യത്തുടനീളമുള്ള കരകൗശല വിദഗ്ധര്‍, ഗ്രാമീണസംരംഭകര്‍, എംഎസ്എംഇകള്‍, സ്റ്റാര്‍ട്ടപ്പുകള്‍ എന്നിവരുടെ സംഗമകേന്ദ്രമായി. ഏക ഭാരതം ശ്രേഷ്ഠ ഭാരതം എന്ന പ്രമേയത്തില്‍ നടന്ന മേളയില്‍ വിവിധ സംസ്ഥാനങ്ങള്‍ക്ക് പുറമെ ചെറുതും വലുതുമായ 3,500 ലധികം സംരംഭകര്‍ പങ്കെടുത്തു.
വിവിധ വിദേശരാജ്യങ്ങളില്‍ നിന്നുള്ള സംരംഭകരും മേളയുടെ ഭാഗമായി. ചെറുകിട ഉത്പാദകര്‍ക്കും ഗ്രാമീണ കരകൗശല വിദഗ്ധര്‍ക്കും ആവശ്യകത പരിശോധിക്കാനും മൊത്ത, ചില്ലറ വാങ്ങുന്നവരുമായി ബന്ധപ്പെടാനും വിവിധ സംസ്ഥാന, കേന്ദ്ര സര്‍ക്കാര്‍ സംവിധാനങ്ങള്‍ ഉപയോഗപ്പെടുത്താനും സഹായകമായി. കേന്ദ്ര- സംസ്ഥാന സര്‍ക്കാരുകളുടെ സഹകരണത്തോടെ ഇന്ത്യ ട്രേഡ് പ്രൊമോഷന്‍ ഓര്‍ഗനൈസേഷനാണ് മേള സംഘടിപ്പിച്ചത്.
മേളയില്‍ തീമാറ്റിക് പ്രസന്റേഷന്‍ വിഭാഗത്തില്‍ കേരളം വെള്ളി നേടി. പാരമ്പര്യവും സാങ്കേതികവിദ്യയും സമന്വയിപ്പിച്ച തീമാണ് കേരളം അവതരിപ്പിച്ചത്. സമാപന സമ്മേളനത്തില്‍ ഐടിപിഒ സിഎംഡി ഡോ. നീരജ് ഖര്‍വാള്‍, എക്സിക്യൂട്ടീവ് ഡയറക്ടര്‍ പ്രേംജിത് ലാല്‍ എന്നിവര്‍ ചേര്‍ന്ന് മെഡല്‍ സമ്മാനിച്ചു. പിആര്‍ഡി അഡീഷണല്‍ ഡയറക്ടര്‍ കെ.ജി. സന്തോഷ്, ഡെ. ഡയറക്ടര്‍മാരായ കെ. സുരേഷ് കുമാര്‍, ബി. ബിനു, ജോ. സെക്രട്ടറി വി. ശ്യാം, അസി. എഡിറ്റര്‍മാരായ രതീഷ് ജോണ്‍, സുരരാജ്, പവലിയന്‍ ഫാബ്രിക്കേറ്റര്‍ വി. പ്രേംചന്ദ് എന്നിവര്‍ ചേര്‍ന്ന് മെഡല്‍ ഏറ്റുവാങ്ങി. തീം, കൊമേഴ്‌സ്യല്‍ ആശയത്തില്‍ 24 സ്റ്റാളുകളാണ് കേരള പവലിയനില്‍ ഉണ്ടായിരുന്നത്.
