തിരുവനന്തപുരം: രാഹുല് മാങ്കൂട്ടത്തിലിനെതിരെയുള്ള ലൈംഗിക പീഡന പരാതിയില് പ്രതികരണവുമായി എം എല് എയ്ക്കെതിരെ ആദ്യം വെളിപ്പെടുത്തല് നടത്തിയ നടി റിനി ആന് ജോര്ജ്. വളരെയധികം സന്തോഷമുണ്ടെന്നും എത്ര അസത്യ പ്രചാരണങ്ങള് നടത്തിയാലും സത്യം വിജയിക്കും എന്നുള്ളതിന്റെ തെളിവാണിതെന്നും നടി പറഞ്ഞു.
അതിജീവിതകള് ആരുമില്ല. ഇത് വെറുമൊരു കെട്ടുകഥമാത്രമാണെന്ന് പ്രചരിപ്പിച്ചവര്ക്ക് നല്കുന്ന മുന്നറിയിപ്പാണിത്.ഒരു അതിജീവിത മാത്രമല്ല, ഒരുപാട് അതിജീവിതകളുണ്ട്.ബുദ്ധിമുട്ടുകള് നേരിട്ട മറ്റു പെണ്കുട്ടികള് മുന്നോട്ട് വരണമെന്നും നിയമപരമായി നേരിടണമെന്നും റിനി ആന് ജോര്ജ് പറഞ്ഞു.
പേരുപറയാതെ താന് ഒരു തുറന്നു പറച്ചില് നടത്തിയതിന് വലിയ സൈബര് അധിക്ഷേപമാണ് ഇപ്പോഴും നേരിടുന്നത്. പ്രതിയും ഒപ്പമുളളവരും യുവതിക്ക് മേല് നടത്തിയ സമ്മര്ദ്ദമാണ് പരാതി നല്കാന് ഇത്രയും വൈകാന് കാരണം എന്നും റിനി പറഞ്ഞു.
വ്യാഴാഴ്ച ഉച്ചയോടെയാണ് രാഹുല് മാങ്കൂട്ടത്തിലിനെതിരെ മുഖ്യമന്ത്രിക്ക് യുവതി നേരിട്ട് ലൈംഗിക പീഡന പരാതി നല്കിയത്. നേരിട്ടെത്തി തെളിവുകളുള്പ്പെടെയാണ് യുവതി പരാതി കൈമാറിയത്. വാട്ട്സപ്പ് ചാറ്റുകള്, ഓഡിയോ സംഭാഷണം അടക്കം കൈമാറിയെന്നാണ് വിവരം. പരാതി ക്രൈംബ്രാഞ്ചിന് കൈമാറി.
