അമ്പലപ്പുഴ: തെരഞ്ഞെടുപ്പ് പടിവാതില്ക്കലെത്തി നില്ക്കേ വോട്ടു പിടിക്കാന് സിപിഎമ്മിന്റെ നേതൃത്വത്തില് വോട്ടര്മാരെ സ്വാധീനിക്കുന്നു. സ്ത്രീ സുരക്ഷാ പദ്ധതിയുടെ അച്ചടിച്ച വ്യാജ അപേക്ഷ ഫോറമാണ് രഹസ്യമായി നല്കുന്നത്. പുറക്കാട് കരൂര് അയ്യന് കോയിക്കല് വാര്ഡിലാണ് തൊഴിലുറപ്പ് മേറ്റുമാരുടെ നേതൃത്വത്തില് എല്ലാ വീട്ടിലും ഫോറം എത്തിക്കുന്നത്.
ഇതു പൂരിപ്പിച്ചു തിരിച്ചേല്പ്പിച്ചാല് ഉടന് പണം ലഭിക്കുമെന്നാണ് മേറ്റുമാര് സ്ത്രീ വോട്ടര്മാരോട് പറയുന്നത്. ഇത് തെരഞ്ഞെടുപ്പ് മാര്ഗനിര്ദേശത്തിന്റെ ലംഘനമാണെന്ന് ആക്ഷേപമുയര്ന്നിട്ടുണ്ട്. അപേക്ഷ ഫോറം വ്യാജമായി അച്ചടിച്ചു വിതരണം ചെയ്യുകയാണ് സിപിഎം പ്രവര്ത്തകര്. ഇതിനെതിരെ തെരഞ്ഞെടുപ്പ് കമ്മീഷന് പരാതി നല്കുമെന്ന് വാര്ഡിലെ പ്രതിപക്ഷ നേതാക്കള് പറഞ്ഞു.
തോല്വി മണത്ത വാര്ഡുകളില് വ്യാജ അപേക്ഷാ ഫോറങ്ങളുമായി സിപിഎം രംഗത്തെത്തിയത് എന്നാണ് വിമര്ശനം. വാര്ഡുകളില് മേറ്റുമാരെ വരെ ഉപയോഗിച്ചാണ് വ്യാജ അപേക്ഷാ ഫോറങ്ങള് വിതരണം ചെയ്യുന്നത്. സിപിഎം അനുഭാവികള് കൂടിയായ പഞ്ചായത്ത് സെക്രട്ടറിമാരും ഇതിന് ഒത്താശ ചെയ്യുന്നതായി ആരോപണമുണ്ട്. തെരഞ്ഞെടുപ്പു ചട്ടം നിലനില്ക്കേ ഇത്തരത്തിലുള്ള വാഗ്ദാദാനങ്ങള് പാടില്ല എന്ന നിയമം നിലനില്ക്കേയാണ് ഭരണസ്വാധീനം ഉപയോഗിച്ച് സിപിഎമ്മിന്റെ നേതൃത്വത്തില് തരംതാണ രാഷ്ട്രീയം കളിക്കുന്നത്.
ബിജെപി അടക്കമുള്ള രാഷ്ട്രീയ പാര്ട്ടികള് ഇതിനെതിരെ രംഗത്ത് വന്നു കഴിഞ്ഞു.
