മലയാലപ്പുഴയില്‍ പോസ്റ്ററും ബാലറ്റ് പേപ്പറും തമിഴില്‍

കോന്നി: തെരഞ്ഞെടുപ്പില്‍ അനൗണ്‍സ്‌മെന്റും ചുവരെഴുത്തും പോസ്റ്ററുകളും മാത്രമല്ല ബാലറ്റ് പേപ്പര്‍ വരെ തമിഴില്‍ അച്ചടിക്കുന്ന ചില ബൂത്തുകള്‍ ഉണ്ട് പത്തനംതിട്ട ജില്ലയില്‍. തമിഴര്‍ക്കു ഭൂരിപക്ഷമുള്ള മലയാലപ്പുഴ ഗ്രാമപഞ്ചായത്തിലെ 4, 5 വാര്‍ഡുകളിലും സീതത്തോട് പഞ്ചായത്തിലെ ഗവി വാര്‍ഡിലുമാണ് അനൗണ്‍സ്‌മെന്റ് മുതല്‍ ബാലറ്റ് പേപ്പര്‍ വരെ തമിഴിലുള്ളത്.

മലയാലപ്പുഴയിലെ ഹാരിസണ്‍ മലയാളം പ്ലാന്റേഷന്റെ കുമ്പഴത്തോട്ടം(ചെങ്ങറ) മേഖലയിലാണ് തമിഴര്‍ക്ക് ഭൂരിപക്ഷമുള്ള 4, 5 വാര്‍ഡുകള്‍ സ്ഥിതി ചെയ്യുന്നത്. ‘ഭാഷാ ന്യൂ
നപക്ഷ വാര്‍ഡുകള്‍’ എന്ന പേരിലാണ് ഇവിടം അറിയപ്പെടുന്നത്.

കുടിയേറ്റ പാരമ്പര്യം

തമിഴ്‌നാട്ടിലെ ശങ്കരന്‍കോവില്‍, തിരുനെല്‍വേലി എന്നിവിടങ്ങളില്‍ നിന്ന് ഏകദേശം 150 വര്‍ഷങ്ങള്‍ക്ക് മുന്‍പ് എത്തിയ തോട്ടം തൊഴിലാളികളാണ് ഇവര്‍. അഞ്ചാം തലമുറയിലെ തമിഴ് വംശജരായ ഇവര്‍ ഇപ്പോഴും പാരമ്പര്യം മറക്കാതെ തമിഴ് ഭാഷയും ജീവിതശൈലിയും അതേപടി പിന്തുടരുന്നു. തെരഞ്ഞെടുപ്പ് കാലത്ത് കുമ്പഴത്തോട്ടത്തിലേക്ക് വന്നാല്‍ തമിഴ്‌നാട്ടിലെ ഏതോ ഗ്രാമത്തില്‍ എത്തിയ പ്രതീതിയാണ് ഉണ്ടാവുക. തെരുവുകളിലെ പടങ്ങള്‍, സ്ഥാനാര്‍ത്ഥി പോസ്റ്ററുകള്‍, പ്രചാരണ മുദ്രാവാക്യങ്ങള്‍ തുടങ്ങി സര്‍വത്ര തമിഴ്മയം.

ബാലറ്റ് പേപ്പറും തമിഴില്‍

സമ്മതിദായര്‍ക്കു വേണ്ടി ബാലറ്റ് പേപ്പറും തമിഴ് ലിപിയിലാണ് അച്ചടിക്കുന്നത് എന്ന പ്രത്യേകതയുമുണ്ട്. വോട്ടര്‍മാരില്‍ ഭൂരിപക്ഷവും തമിഴ് തൊഴില്‍ പാരമ്പര്യമുള്ളവരാണ്. ഭൂരിപക്ഷവും സ്ഥാനാര്‍ത്ഥികളിലും തമിഴ് വംശജര്‍ക്കു തന്നെ.

പോളിങ് സ്റ്റേഷനും പഴയ തമിഴ് സ്‌കൂള്‍

ഹാരിസണ്‍ എസ്റ്റേറ്റില്‍ ഒരിക്കല്‍ തമിഴ് സിലബസില്‍ പ്രവര്‍ത്തിച്ചിരുന്ന പഴയ സ്‌കൂളാണ് വര്‍ഷങ്ങളായി ഇവിടുത്തെ പോളിങ് സ്റ്റേഷന്‍.

ഒരു കാലത്ത് ജനപ്രതിനിധികള്‍ക്ക് മലയാളം അറിയുകയേ ഇല്ലായിരുന്നു. അതിനു മാറ്റം വന്നെങ്കിലും ഇപ്പോഴുള്ളവരും തമിഴ് കലര്‍ന്ന മലയാളം സംസാരിക്കുന്നവരാണ്. മലയാലപ്പുഴയിലെ 4, 5 വാര്‍ഡുകളിലായി എണ്ണൂറിലേറെ തമിഴ് വോട്ടര്‍മാരാണ് ഉള്ളത്. തമിഴ്‌നാട്ടില്‍ നിന്നുള്ള തൊഴിലാളികളുടെ പിന്‍ഗാമികള്‍ക്കൊപ്പം മംഗലാപുരത്ത് നിന്ന് വന്ന മലയാളി- തമിഴ് തൊഴിലാളികളും ഇവിടെയുണ്ട്.