കണ്ണൂര്‍: നാട്ടിലെ ഇടവഴികളെല്ലാം റോഡാക്കണം. ഗ്രാത്തിലെ ഏക്കര്‍കണക്കിന് തരിശ്ശായിക്കിടക്കുന്ന നെല്‍വയല്‍ കൃഷിയോഗ്യമാക്കണം. കണ്ണൂര്‍ ജില്ലയിലെ അഞ്ചരക്കണ്ടി പഞ്ചായത്തിലെ എക്കാല്‍ വാര്‍ഡില്‍ എന്‍ഡിഎ സ്ഥാനാര്‍ത്ഥിയായി മത്സരിക്കുന്ന ഇരുപത്തൊന്നുകാരി കെ. നന്ദന ലക്ഷ്യം ജനങ്ങള്‍ക്കു മുന്നില്‍ വെച്ചു കഴിഞ്ഞു. സ്ഥിരമായി സിപിഎം സ്ഥാനാര്‍ത്ഥി ജയിക്കുന്ന വാര്‍ഡില്‍ വികസനമൊന്നും തന്നെ എത്തിയിട്ടില്ല.
വീടുകളിലെത്താന്‍ ഇപ്പോഴും നല്ല റോഡുകളില്ല. തെരഞ്ഞെടുപ്പ് കഴിഞ്ഞാല്‍ സ്ഥാനാര്‍ത്ഥികള്‍ പിന്നെ അങ്ങോട്ടു പോകാറില്ല. വിളഞ്ഞ് നില്‍ക്കുന്ന നെല്‍വയല്‍ നന്ദനയുടെ ഓര്‍മയിലുണ്ട്. എന്നാല്‍ ഇപ്പോള്‍ അതെല്ലാം തരിശ്ശായി കിടക്കുകയാണ്. ജയിച്ചാല്‍ എന്ത് ചെയ്യുമെന്ന ചോദ്യത്തിന് ആത്മവിശ്വാസത്തോടെ നന്ദനയ്‌ക്ക് ഒറ്റ ഉത്തരമേയുള്ളു. ഇടവഴികളെല്ലാം റോഡാക്കണം. വയലുകളില്‍ വീണ്ടും നെല്ലു വിളയണം.
ഇതിനെല്ലാം പണമെവിടെയെന്ന ചോദ്യത്തിനും കൃത്യമായ ഉത്തരമുണ്ട്.
കാര്‍ഷിക മേഖലയുടെ വികസനത്തിനും ഗ്രാമീണ റോഡുകള്‍ക്കും മോദി സര്‍ക്കാരിന്റെ പദ്ധതികളുണ്ട്. അത്തരം പദ്ധതികള്‍ ഗ്രാമത്തിലെത്തിക്കും. എതിരാളികളെ നിഷ്പ്രഭമാക്കുന്ന പ്രചാരണമണ് തുടക്കം മുതല്‍ തന്നെ നന്ദനയുടേത്. പക്വതയുള്ള ഇടപെടലുകളും ഓരോ വിഷയത്തിലുമുള്ള പ്രതികരണവും ആരെയും അത്ഭുതപ്പെടുത്തും. പ്രദേശവാസികള്‍ക്ക് സുപരിചിതയായ സ്വന്തം വീട്ടിലെ കുട്ടിയായ നന്ദന എല്ലാ വീട്ടിലുമെത്തി ഒരു തവണ വോട്ടഭ്യര്‍ത്ഥിച്ചു കഴിഞ്ഞു. അച്ഛന്‍ സത്യനും അമ്മ ഷീജയും പ്രചാരണത്തില്‍ സജീവമായി കൂടെയുണ്ട്. സഹോദരി: പാര്‍വണ.
ജന്മഭൂമി ഓണ്‍ലൈന്‍