ജ്യോതിഷ പാരമ്പര്യവും സംസ്കൃതത്തിലുള്ള ഉന്നത ബിരുദവുമാണ് എറണാകുളം ജില്ലാ പഞ്ചായത്ത് വെങ്ങോല ഡിവിഷനിലെ എന്ഡിഎ സ്ഥാനാര്ത്ഥി അപര്ണ വിഷ്ണുവിനെ വ്യത്യസ്തയാക്കുന്നത്. അപര്ണയുടെ അച്ഛന് ശ്രീനിവാസനും മുത്തച്ഛനും ജ്യോത്സ്യന്മാരായിരുന്നു. രാഘവപണിക്കര് പ്രസിദ്ധ ജ്യോത്സ്യനായിരുന്നു. രാഷ്ട്രീയക്കാരടക്കം വിവിധ മേഖലയിലുള്ളവര് പ്രശ്നപരിഹാരത്തിനായി ഇവിടെ എത്തിയിരുന്നു. ആ പാരമ്പര്യമാണ് അപര്ണയ്ക്ക് സംസ്കൃതം പഠിക്കാന് പ്രേരണയായത്.
സ്കൂള് കാലഘട്ടത്തില് രണ്ടാം ഭാഷ സംസ്കൃതമായിരുന്നു. പ്ലസ് വണ് മുതല് മുഖ്യവിഷയമായി സംസ്കൃതം പഠിച്ചു. കാലടി ശ്രീശങ്കരാചാര്യ സംസ്കൃത സര്വകലാശാലയില് നിന്നും സംസ്കൃതം ജനറലില് ബിഎയും എംഎയും പാസായശേഷം ശ്രീചന്ദ്രശേഖര യൂണിവേഴ്സിറ്റിയില് നിന്നും എംഫില് പാസായി. കാളിദാസന്റെ മാളവികാഗ്നിമിത്രം നാടകത്തെക്കുറിച്ചുള്ളതായിരുന്നു എംഫില് തിസീസ്. ഇപ്പോള് റിസര്ച്ചിനായി പിഎച്ച്ഡി എന്ട്രന്സ് എഴുതിയിരിക്കുകയാണ്. ഒരുപക്ഷെ സംസ്കൃതത്തില് എംഫില് ഉള്ള ഏക സ്ഥാനാര്ത്ഥി അപര്ണയായിരിക്കും.
കോഴിക്കോടു വടകര സ്വദേശിയായ അപര്ണ യുവമോര്ച്ച സംസ്ഥാന സെക്രട്ടറി വിഷ്ണു സുരേഷിനെ വിവാഹം കഴിച്ചെത്തിയാണ് വെങ്ങോലയുടെ മകളായത്. അപര്ണയുടെ അമ്മ സീന ശ്രീനിവാസന് എന്ഡിഎ സ്ഥാനാര്ത്ഥിയായി വടകര മണിയൂര് ഗ്രാമപഞ്ചായത്തില് നാലാം വാര്ഡില് മത്സരിക്കുന്നുണ്ട്. അപര്ണയുടേത് കന്നിയങ്കമാണെങ്കില് അമ്മയുടേത് രണ്ടാമത്തെ മത്സരമാണ്.
വിദ്യാര്ത്ഥി പരിഷത്ത് പ്രവര്ത്തകയായി പോരാട്ടങ്ങളിലൂടെ വളര്ന്നുവന്ന പാരമ്പര്യമാണ് അപര്ണയുടേത്. എബിവിപി കൊയിലാണ്ടി നഗര് വിദ്യാര്ത്ഥി പ്രമുഖ്, കാലടി സംസ്കൃത സര്വകലാശാല യൂണിറ്റ് സെക്രട്ടറി, സംസ്ഥാന സമിതിയംഗം, ദേശീയ നിര്വാഹക സമിതിയംഗം എന്നീ നിലകളില് പ്രവര്ത്തിച്ചിട്ടുണ്ട്. നിരവധി പ്രക്ഷോഭ ങ്ങള്ക്ക് നേതൃത്വം വഹിച്ചിട്ടുണ്ട്. ഇവര്ക്ക് ഒന്നര വയസുള്ള മകനുമുണ്ട്. മകനുമായിട്ടാണ് പലപ്പോഴും വോട്ട് തേടുന്നത്. എല്ലാ കാര്യത്തിലും വിഷ്ണുവിന്റെ തികഞ്ഞ പിന്തുണയുമുണ്ട്. ആദ്യ മത്സരത്തില് തന്നെ മാറ്റമുണ്ടാക്കാമെന്ന പ്രതീക്ഷയാണ് ഇവര്ക്കുള്ളത്.
ജന്മഭൂമി ഓണ്ലൈന്