പത്തനംതിട്ട: സ്വര്ണക്കൊള്ളയിലെ ഒന്നാം പ്രതി ഉണ്ണികൃഷ്ണന് പോറ്റിയും കട്ടിളപ്പാളി കേസിലെ എട്ടാം പ്രതി ദേവസ്വം ബോര്ഡ് മുന് പ്രസിഡന്് എ. പത്മകുമാറും നടത്തിയ വിദേശ യാത്രകള് എസ്ഐടി അന്വേഷിക്കുന്നു. പത്മകുമാറിന്റെ പാസ്പോര്ട്ട് എസ്ഐടി പിടിച്ചെടുത്തിരുന്നു. പോറ്റിയുടെ പാസ്പോര്ട്ട് പരിശോധനയില് അയാള് ഈജിപ്തും ഇംഗ്ലണ്ടും സന്ദര്ശിച്ചതായി വ്യക്തമായി. 2019ലെ സ്വര്ണ കൊള്ളയ്ക്ക് ശേഷമായിരുന്നു വിദേശ സന്ദര്ശനങ്ങള്. പോറ്റിയോടൊപ്പം പത്മകുമാറും പോയിരുന്നോ എന്നാണ് എസ്ഐടി അന്വേഷിക്കുന്നത്. മറ്റു പ്രതികളിലേക്കും ഇതു സംബന്ധിച്ച അന്വേഷണം നീളും. പോറ്റിയുടെ വിദേശ യാത്രകളില് വിശദാന്വേഷണം ഉണ്ടാവുമെന്ന് നേരത്തെ ജന്മഭൂമി വാര്ത്ത നല്കിയിരുന്നു.
എന്തിനാണ് പോറ്റി ഈജിപ്തും ഇംഗ്ലണ്ടും സന്ദര്ശിച്ചതെന്നത് സംശയമുണര്ത്തുന്നു. അവിടങ്ങളിലെ മ്യൂസിയങ്ങളുമായി പോറ്റി ബന്ധപ്പെട്ടിരുന്നോ എന്ന് അറിയേണ്ടതുണ്ട്. ദ്വാരപാലക ശില്പ പാളികള് സ്വര്ണത്തോടൊപ്പം അന്താരാഷ്ട്ര വിഗ്രഹക്കടത്തു ലോബിക്ക് വന്വിലയ്ക്കു വിറ്റിരിക്കാം എന്ന സംശയം നേരത്തെ ഹൈക്കോടതി ഉന്നയിച്ചിരുന്നു.
പോറ്റിയുടെ ഈജിപ്ത് യാത്രയാണ് കൂടുതല് സംശയാസ്പദം. പുരാതന വസ്തുക്കള് പ്രദര്ശിപ്പിക്കുന്ന ഒട്ടേറെ മ്യൂസിയങ്ങള് ഇംഗ്ലണ്ടിലും ഈജിപ്തിലും ഉണ്ട്. ഇവിടങ്ങളിലെ അതിസമ്പന്നര്ക്കും വിഗ്രഹങ്ങളിലും ക്ഷേത്ര വസ്തുക്കളിലും താത്പര്യമുണ്ട്.
