തൃശൂര്: നട്ടെല്ല് ശസ്ത്രക്രിയയില് യൂണിലാറ്ററല് ബൈപോര്ട്ടല് എന്ഡോസ്കോപ്പിക് (യുബിഇ) സിസ്റ്റം തൃശൂര് ജൂബിലി മിഷന് മെഡിക്കല് കോളേജ് ആന്ഡ് റിസര്ച്ച് ഇന്സ്റ്റിറ്റ്യൂട്ടില് സ്ഥാപിച്ചു. ജര്മ്മന് മെഡിക്കല് ടെക്നോളജി കമ്പനിയായ റിച്ചാര്ഡ് വുള്ഫ് ജിഎംബിഎച്ച് വികസിപ്പിച്ച ഈ സാങ്കേതിക വിദ്യ അന്താരാഷ്ട്ര തലത്തില് പ്രശസ്തമാണ്.
ഹെര്ണിയേറ്റഡ് ഡിസ്കുകള് പോലുള്ള അവസ്ഥകളെ ചികിത്സിക്കുന്നതിനായി യുബിഇ സിസ്റ്റം സഹായിക്കും. അസാധാരണമായ കൃത്യതയിലുടെ ചികിത്സയുടെ ആഘാതം കുറയ്ക്കുന്ന സാങ്കേതിക വിദ്യയാണിതെന്ന് ആശുപത്രി ഡയറക്ടര് ഫാ. റെന്നി മുണ്ടന്കുര്യന്, ന്യൂറോസര്ജറി മേധാവി ഡോ. എന്. ഐ. കുര്യന് എന്നിവര് പറഞ്ഞു.
സങ്കീര്ണമായ കേസുകളില് നട്ടെല്ലിന്റെ ഇരുവശങ്ങളിലുമുള്ള ശസ്ത്രക്രിയകള് ഒരേസമയം തന്നെ നടത്താന് ശസ്ത്രക്രിയാ വിദഗ്ധര്ക്ക് കഴിയുമെന്നതും പ്രധാന നേട്ടമാണെന്ന് ഡോ. കുര്യന് പറഞ്ഞു. ഉദ്ഘാടന ചടങ്ങില് ഡയറക്ടര് ഫാ. റെന്നി മുണ്ടന്കുര്യന്, അസി. ഡയറക്ടര് ഫാ. സിന്റോ കരേപറമ്പന്, മെഡി. സൂപ്രണ്ട് ഡോ. ഷിബു കള്ളിവളപ്പില്, ന്യൂറോ സര്ജറി മേധാവി ഡോ. എന്. ഐ. കുര്യന്; ന്യൂറോ സര്ജന് ഡോ. രമേശ് എസ., ചീഫ് കാര്ഡിയോളജിസ്റ്റ് ഡോ. ഗോവിന്ദന് ഉണ്ണി, ഇന്-ചാര്ജ് സിസ്റ്റര് റെജീന, സ്റ്റെല്ലാര് സര്ജറി സിസ്റ്റം ഡയറക്ടര് സജിത്ത് റഹ്മാന് എന്നിവര് പങ്കെടുത്തു.
