നെയ്യാറ്റിന്കര: എസ്ഡിപിഐ ഭീഷണിയെ തുടര്ന്ന് നഗരസഭ ഇരട്ട താഴിട്ടു പൂട്ടിയ ആറാലുംമൂട് ശിവപുരം മഹാദേവ ക്ഷേത്ര ഗേറ്റ് അടിയന്തിരമായി ഭക്തര്ക്ക് തുറന്നുകൊടുക്കണമെന്ന് ക്ഷേത്രം സന്ദര്ശിച്ച ഹിന്ദു ഐക്യവേദി നേതാക്കള് ആവശ്യപ്പെട്ടു. പുറത്തുനിന്ന് വന്ന ഇസ്ലാമിസ്റ്റുകളാണ് ആറാലുംമൂട്ടിലെ സമാധാനം കെടുത്താന് ശ്രമിക്കുന്നത്. നഗരസഭാ സെക്രട്ടറിക്കും ചെയര്മാനും എസ്ഡിപിഐക്കാരുടെ ഭീഷണിയില് മുട്ടുവിറച്ചു. ക്ഷേത്രത്തിന്റെ അടച്ചുപൂട്ടിയ പ്രധാന കവാടം നഗരസഭ ഭക്തര്ക്ക് തുറന്നു കൊടുക്കും വരെ ഹിന്ദു ഐക്യവേദിയും കേരള ക്ഷേത്ര സംരക്ഷണ സമിതിയും പ്രക്ഷോഭം നടത്തും. നൂറ്റാണ്ടിനടുത്ത് പഴക്കവും പാരമ്പര്യവുമുള്ള സര്പ്പ കാവ് നിലനിന്ന ഭൂമിയിലെ ശിവക്ഷേത്രത്തിനെതിരെയാണ് തീവ്രവാദ സമാന പ്രവര്ത്തനം നടന്നിരിക്കുന്നത്. കനാലിന്റെ കരയില് വാഹനം കടക്കാന് പറ്റാത്ത തരത്തില് അന്പതോളം മുസ്ലീം കുടുംബങ്ങള് പട്ടയമില്ലാതെ വര്ഷങ്ങളായി കുടില് കെട്ടി താമസിക്കുന്നുണ്ട്, നഗരസഭ അവര്ക്കാദ്യം ഭൂമിയോ പട്ടയമോ നല്കണം. അവര് ശിവപുരം ക്ഷേത്രത്തിനെതിരല്ല. ആ മനുഷ്യരുടെ ജീവിതവും തകര്ക്കാനാണ് പുറത്തുനിന്ന് വന്ന എസ്ഡിപിഐ സംഘം ശ്രമിക്കുന്നതെന്നും ഹിന്ദു ഐക്യവേദി നേതാക്കള് പറഞ്ഞു.
ഹിന്ദു ഐക്യവേദി സംസ്ഥാന സെക്രട്ടറി കെ.പ്രഭാകരന്, ജില്ലാ വര്ക്കിംഗ് പ്രസിഡന്റ് കല്ലിയൂര് കൃഷ്ണകുമാര്, ജില്ലാ ജനറല് സെക്രട്ടറി അറപ്പുര ബിജു, നെയ്യാറ്റിന്കര താലൂക്ക് പ്രസിഡന്റ് ജിനചന്ദ്രന്, താലൂക്ക് ജനറല് സെക്രട്ടറിമാരായ പാറശാല കണ്ണന്, ജഗന്, വര്ക്കിംഗ് പ്രസിഡന്റ് അനില് കുമാര് എന്നിവരുടെ നേതൃത്വത്തിലായിരുന്നു ക്ഷേത്രം സന്ദര്ശിച്ചത്.
ശിവപുരം ശിവക്ഷേത്രത്തില് ഭക്തര്ക്ക് കടന്ന് വരാനുള്ള വഴി നഗരസഭ തുറന്ന് നല്കണമെന്ന് ക്ഷേത്ര സംരക്ഷണസമിതി ആവശ്യപ്പെട്ടു.
എസ്ഡിപിഐയുടെ ഭീഷണിയെ തുടര്ന്നാണ് നെയ്യാറ്റിന്കര നഗരസഭ ഗേറ്റ് സ്ഥാപിച്ച് വഴി അടച്ചത്. സമീപത്തെ കനാലിന്റെ കര ഒരു വിഭാഗം കൈയേറി വീട് നിര്മിച്ചതിനാല് അതുവഴിയും ഭക്തര്ക്ക് വരാന് സാധിക്കുന്നില്ല. ഇത് അറിയാമായിരുന്നിട്ടും നഗരസഭ വഴി അടച്ചു.
വഴി തുറന്ന് നല്കിയില്ലെങ്കില് പ്രതിഷേധ പരിപാടികളുമായി മുന്നോട്ട് പോകുമെന്നും ക്ഷേത്രസംരക്ഷണ സമിതി അറിയിച്ചു. സമിതി സംസ്ഥാന പ്രചാര് പ്രമുഖ് ഷാജു വേണുഗോപാല്, മേഖല സെക്രട്ടറി വെള്ളായണി ഭുവനചന്ദ്രന്, സംയോജക് പാപ്പനംകോട് അനില്, ഗ്രാമ ജില്ലാ അധ്യക്ഷന് വിജയന് വേങ്കോട്, രാജേഷ് നെയ്യാറ്റിന്കര എന്നിവര് ക്ഷേത്രം സന്ദര്ശിച്ചു.
