അമ്പലപ്പുഴ : അമ്പലപ്പുഴയില് ശക്തമായ മത്സരത്തിനൊരുങ്ങി എന്ഡിഎ, ഇടതു വലതു മുന്നണികള് ഉപേക്ഷിച്ച് ബിജെപിയിലേയ്ക്ക് നേതാക്കളുടെയും പ്രവര്ത്തകരുടെയും ഒഴുക്ക് തുടരുന്നു. പുറക്കാട്,അമ്പലപ്പുഴ പഞ്ചായത്തുകളിലാണ് ഇടതു വലതു മുന്നണികളിലെ നിരവധി നേതാക്കള് ബിജെപിയില് അംഗത്വമെടുത്തത്. ഇതില് പലരും സ്ഥാനാര്ത്ഥികളായി മത്സര രംഗത്ത് എത്തുകയും ചെയ്തു. സിപിഎം നേതാവ് അഡ്വ. ശ്രീകുമാര് കഴിഞ്ഞ ദിവസം പാര്ട്ടിയില് നിന്ന് രാജിവെച്ചു. അമ്പലപ്പുഴ തെക്ക് പഞ്ചായത്തില് ആമയിടവാര്ഡില് എന്ഡിഎ സ്ഥാനാര്ത്ഥിയായി മത്സര രംഗത്ത് എത്തിയതോടെ ശക്തമായ മത്സരമാണ് ഇവിടെ നടക്കുന്നത്.
പ്രദേശത്തെ പൊതു സമ്മതനായ നേതാവാണ് ശ്രീകുമാര്. പുറക്കാട് പഞ്ചായത്തില് സിപിഎം തോട്ടപ്പള്ളി അയ്മനം ബ്രാഞ്ച് സെക്രട്ടറിയും എന്എന്ഡിപി രണ്ടായിരത്തി ഒരു നൂറ്റി എണ്പത്തിഏഴാം നമ്പര് ശാഖാ സെക്രട്ടറി കൂടിയായ വിജി പാര്ട്ടിയില് നിന്ന് രാജിവെയ്ക്കുകയും ബിജെപി അംഗത്വം എടുത്ത് ഇതേ വാര്ഡില് എന്ഡിഎ സ്ഥാനാര്ത്ഥിയായി മത്സര രംഗത്ത് എത്തുകയായിരുന്നു. ആര്എസ്എസിന്റെ നൂറാം ജന്മവാര്ഷികം പ്രമാണിച്ച് തോട്ടപ്പള്ളിയില് നടന്ന പഥ സഞ്ചലനത്തിന്റ പൊതു പരിപാടിയില് വിജി അദ്ധ്യക്ഷനായിരുന്നു.
പഞ്ചായത്തിലെ പന്ത്രണ്ടാം വാര്ഡിലും സിപിഎമ്മിന്റെ വനിതാ നേതാവ് പാര്ട്ടിയില് നിന്ന് രാജിവെച്ച് ബിജെപി അംഗത്വം എടുത്ത് ഇതേ വാര്ഡില് ബിജെപി സ്ഥാനാര്ത്ഥിയായി മത്സര രംഗത്ത് എത്തിയതും പ്രവര്ത്തകരില് ആത്മവിശ്വാസം വര്ദ്ധിപ്പിച്ചു കഴിഞ്ഞു. അമ്പലപ്പുഴ വടക്ക് പഞ്ചായത്തില് സിപിഎം കുടുബം ഒന്നടങ്കം ബിജെപിയില് എത്തി. കഞ്ഞിപ്പാടത്ത് കൈതപ്പറമ്പ് വീട്ടില് നിക്സണും കുടുംബവുമാണ് ദീര്ഘനാളത്തെ സിപിഎം ബന്ധം ഉപേക്ഷിച്ച് ബിജെപിയിലേക്ക് എത്തിയത്.ഇവരെ കഴിഞ്ഞ ദിവസം സംസ്ഥാന സെക്രട്ടറി പൂന്തുറ ശ്രീകുമാര് വീട്ടിലെത്തി ബിജെപി അംഗത്വം നല്കുകയും നിക്സന്റെ ഭാര്യ അനിതയെ ബ്ലോക്ക് പഞ്ചായത്ത് എന്ഡിഎ സ്ഥാനാര്ത്ഥിയായി പ്രഖ്യാപിക്കുകയുമായിരുന്നു.
ഇരു മുന്നണികളില് നിന്ന് നൂറുകണക്കിന് പ്രവര്ത്തകരും നേതാക്കളുമാണ് തെരഞ്ഞെടുപ്പ് പ്രഖ്യാപിച്ചതോടെ ബിജെപിയില് അംഗത്വം എടുത്ത് പ്രവര്ത്തിക്കുന്നത്. നരേന്ദ്ര മോദി സര്ക്കാരിന്റെ വികസന പദ്ധതികള് കേരളത്തിലും വരണം എന്ന് ഇവര് പറയുന്നു. വരും ദിവസങ്ങളില് ഇനിയും മറ്റ് പാര്ട്ടികള് ഉപേക്ഷിച്ച് കൂടുതല് ആളുകള് ബിജെപിയില് എത്തുമെന്ന് നേതാക്കള് അറിയിച്ചു.
