കാസര്ഗോഡ് : ഡിസിസി ഓഫീസിലെ തമ്മിലടിയുടെ ദൃശ്യങ്ങള് ഫോണില് പകര്ത്തിയ കാസര്ഗോഡ് ബ്ലോക്ക് കോണ്ഗ്രസ് കമ്മിറ്റി സെക്രട്ടറി സഫ് വാന് കുന്നിലിനെ പാര്ട്ടിയില് നിന്നും സസ്പെന്ഡ് ചെയ്തു. സീറ്റ് വിഭജന തര്ക്കത്തിലാണ് കാസര്കോട് ഡിസിസി ഓഫീസില് കയ്യാങ്കളി ഉണ്ടായത്. ഡിസിസി വൈസ് പ്രസിഡന്റ് ജയിംസ് പന്തമാക്കനും ഡികെടിഎഫ് ജില്ലാ പ്രസിഡന്റ് വാസുദേവനുമാണ് ഡിസിസി ഓഫീസിനുളളില് വച്ച് തമ്മിലടിച്ചത്.
പിന്നാലെ ഇതിന്റെ ദൃശ്യങ്ങള് പുറത്തുവന്നു. തുടര്ന്ന് സംഘടനാ വിരുദ്ധ പ്രവര്ത്തനം നടത്തിയവര്ക്കെതിരെ നടപടി ഉണ്ടാകുമെന്ന് ജില്ലയുടെ ചുമതലയുള്ള കെപിസിസി വൈസ് പ്രസിഡന്റ് എം ലിജു പറഞ്ഞിരുന്നു. ലിജുവിന്റെ നേതൃത്വത്തില് ചര്ച്ച നടക്കുമ്പോഴാണ് ഹാളിന് പുറത്ത് നേതാക്കള് ഏറ്റുമുട്ടിയത്.
ഈസ്റ്റ് എളേരി പഞ്ചായത്തിലെ സീറ്റ് വിഭജനവുമായി ബന്ധപ്പെട്ട തര്ക്കമാണ് അടിപിടിയില് കലാശിച്ചത്. എന്നാല് ഇരു നേതാക്കളും തമ്മിലുള്ള വ്യക്തിപരമായ പ്രശ്നമാണെന്നാണ് പാര്ട്ടിയുടെ വിശദീകരണം.
