ന്യൂദൽഹി: കോൺഗ്രസ് നേതാവും തിരുവനന്തപുരം എംപിയുമായ ശശി തരൂർ അടുത്തിടെ പ്രധാനമന്ത്രി നരേന്ദ്ര മോദി നടത്തിയ പ്രസംഗത്തെ പ്രശംസിച്ചതിനെ അതിരൂക്ഷമായി വിമർശിച്ച് നിരവധി കോൺഗ്രസ് നേതാക്കൾ രംഗത്ത്. മുതിർന്ന നേതാവും മുൻ കോൺഗ്രസ് എംപിയുമായ സന്ദീപ് ദീക്ഷിത് തരൂരിനെ ലക്ഷ്യം വച്ചുകൊണ്ട് ഇന്നലെ വിമർശനങ്ങൾ ഉന്നയിച്ചു.
നിങ്ങൾ എന്തിനാണ് കോൺഗ്രസിൽ തുടരുന്നതെന്നും തരൂരിനെ അദ്ദേഹം കപടനാട്യക്കാരനെന്ന് പോലും വിളിച്ചു.
“ശശി തരൂരിന്റെ പ്രശ്നം അദ്ദേഹത്തിന് രാജ്യത്തെക്കുറിച്ച് കൂടുതൽ അറിയില്ല എന്നതാണ്. കോൺഗ്രസ് നയങ്ങൾക്ക് വിരുദ്ധമായി ആരെങ്കിലും രാജ്യത്തിന് നല്ലത് ചെയ്യുന്നുണ്ടെന്ന് നിങ്ങൾ കരുതുന്നുവെങ്കിൽ, നിങ്ങൾ ആ നയങ്ങൾ സ്വീകരിക്കണം. നിങ്ങൾ എന്തിനാണ് കോൺഗ്രസിൽ ? നിങ്ങൾ ഒരു എംപി ആയതുകൊണ്ട് മാത്രം?” – സന്ദീപ് ദീക്ഷിത് പറഞ്ഞു.
കൂടാതെ ബിജെപിയുടെയോ പ്രധാനമന്ത്രി മോദിയുടെയോ തന്ത്രങ്ങൾ നിങ്ങളുടെ പാർട്ടിയേക്കാൾ നന്നായി പ്രവർത്തിക്കുന്നുണ്ടെന്ന് നിങ്ങൾ ശരിക്കും വിശ്വസിക്കുന്നുവെങ്കിൽ, നിങ്ങൾ പ്രതികരിക്കണം. നിങ്ങൾ അങ്ങനെ ചെയ്യുന്നില്ലെങ്കിൽ, നിങ്ങൾ ഒരു കപടനാട്യക്കാരനാണെന്നും സന്ദീപ് ദീക്ഷിത് പറഞ്ഞു. നേരത്തെ കോൺഗ്രസ് നേതാവ് സുപ്രിയ ശ്രീനേറ്റും തരൂരിനെ വിമർശിച്ചിരുന്നു. പ്രധാനമന്ത്രി മോദിയുടെ പ്രസംഗത്തിൽ പ്രശംസ അർഹിക്കുന്ന ഒന്നും ഞാൻ കണ്ടെത്തിയില്ലെന്നും തരൂർ എന്ത് കണ്ടിട്ടാണ് മോദിയെ പുകഴ്ത്തിയതെന്നുമാണ് സുപ്രിയ ചോദിച്ചത്.
രാംനാഥ് ഗോയങ്ക പ്രഭാഷണത്തിന്റെ ആറാം പതിപ്പിൽ പ്രധാനമന്ത്രി നരേന്ദ്ര മോദി നടത്തിയ പ്രസംഗത്തെയാണ് തരൂർ പുകഴ്ത്തിയത്. അതേ സമയം ശശി തരൂർ പലതവണ കേന്ദ്ര സർക്കാരിനെയും നരേന്ദ്ര മോദിയെയും പ്രശംസിച്ചിട്ടുണ്ട്. ഇതിന്റെ പേരിൽ പലപ്പോഴും അദ്ദേഹത്തിന് കോൺഗ്രസ് പാർട്ടിയിൽ നിന്നും വിമർശനങ്ങളും ഏറ്റുവാങ്ങേണ്ടി വന്നിട്ടുമുണ്ട്.
