കൊച്ചി: ശബരിമലയിലെ സ്വര്ണക്കൊള്ളയുമായി ബന്ധപ്പെട്ട് കള്ളപ്പണം വെളുപ്പിക്കലും നടന്നുവെന്ന് എന്ഫോഴ്സ്മെന്റ് അധികൃതര് ഹൈക്കോടതി ദേവസ്വം ബെഞ്ചിനെ അറിയിച്ചു. സ്വര്ണക്കൊള്ളയുമായി ബന്ധപ്പെട്ട കേസുകളുടെ കോപ്പി ലഭ്യമാക്കണമെന്നും ഇ ഡി കോടതിയോട് അഭ്യര്ഥിച്ചു.
തങ്ങളുടെ പ്രാഥമിക അന്വേഷണത്തില് തന്നെ കള്ളപ്പണ ഇടപാടുകള് നടന്നതായി കണ്ടെത്തിയിട്ടുണ്ടെന്നും ഇ ഡി രേഖാമൂലം വ്യക്തമാക്കി. എസ്ഐടി സ്വര്ണക്കൊള്ളയുമായി ബന്ധപ്പെട്ട് എടുത്ത രണ്ടു കേസുകളുടെ എഫ്ഐആറാണ് ഇ ഡി തേടിയത്.
കേസിലെ പ്രതികള്ക്ക് എതിരെ പിഎംഎല്എ പ്രകാരം കേസ് എടുക്കുമെന്നാണ് ഇ ഡി ചൂണ്ടിക്കാട്ടിയത്. പ്രാഥമിക അന്വേഷണത്തിന്റെ വിശദാംശങ്ങളും ഇ ഡി കോടതിയില് സമര്പ്പിച്ചിട്ടുണ്ട്. കേസില് അഴിമതി നിരോധന നിയമം ചുമത്തിയിട്ടുണ്ട്. ഈ സാഹചര്യത്തില് ഇ ഡി അന്വേഷണവും നടത്തേണ്ടതുണ്ട്. കള്ളപ്പണം എങ്ങനെ ഉണ്ടാക്കി, അത് എവിടേക്ക് പോയി. ആരാണ് അത് കരസ്ഥമാക്കിയത് തുടങ്ങിയ കാര്യങ്ങളാണ് അന്വേഷിക്കേണ്ടത്. ഇ ഡിയുടെ അപേക്ഷ തിങ്കളാഴ്ച പരിഗണിക്കും. എഫ്ഐആറിന്റെ പകര്പ്പ് വേണമെന്ന് ആവശ്യപ്പെട്ട് ഇ ഡി റാന്നി കോടതിയില് നല്കിയ അപേക്ഷ തള്ളിയിരുന്നു. അതീവ രഹസ്യമായി അന്വേഷിക്കാന് ഹൈക്കോടതി പറഞ്ഞിരിക്കുന്നതിനാല് പകര്പ്പ് നല്കാനാവില്ലെന്നായിരുന്നു റാന്നി കോടതി പറഞ്ഞത്.
