ന്യൂദല്ഹി ബാബറി മസ്ജിദിന്റെ പേരില് ഡിസംബര് ആറിന് ഇന്ത്യയുടെ തലസ്ഥാനനഗരിയില് ആറിടത്ത് വന്സ്ഫോടനങ്ങള് നടത്താന് ഡോക്ടര്മാരുടെ സംഘത്തിന് പദ്ധതിയുണ്ടായിരുന്നതായി വെളിപ്പെടുത്തല്. ഉമര് നബി രഹസ്യമായി നിരീക്ഷണം നടത്തിയ കൊണോട്ട് പ്ലേസ്, ചെങ്കോട്ട, ഗൗരീശങ്കര് ക്ഷേത്രം, ഷോപ്പിംഗ് മാള്, കോണ്സ്റ്റിറ്റ്യൂഷന് ക്ലബ് എന്നിവിടങ്ങളാണോ തകര്ക്കാന് പദ്ധതിയിട്ടിരുന്നത് എന്ന് കരുതുന്നു. ഡോക്ടര്മാരായതിനാല് ഇവരുടെ നീക്കങ്ങള് ആരും സംശയിക്കില്ലെന്ന് കരുതിയാണ് പാകിസ്ഥാനിലെ ഭീകരസംഘടനയായ ജെയ്ഷ് എ മുഹമ്മദ് ഈ ദൗത്യത്തിനായി ഡോക്ടര്മാരുടെ സംഘത്തെ തന്നെ തെരഞ്ഞെടുത്തത്.
ഉത്തര്പ്രദേശിലെ പലയിടങ്ങളും ബോംബ് സ്ഫോടനത്തിനായി ഇവര് ഉന്നമിട്ടിരുന്നു.ഇതുവഴി മോദിയുടെയും യോഗിയുടെയും പ്രതിച്ഛായ തകര്ക്കുക എന്നതാണ് ജെയ്ഷ് എ മുഹമ്മദ് ലക്ഷ്യമിടുന്നത്.
കാര് സ്ഫോടനത്തിന് പിന്നില് പ്രവര്ത്തിച്ച ഡോക്ടര് ഉമര് നബി ഉള്പ്പെടെ തലസ്ഥാനനഗരിയില് കൊണോട്ട് പ്ലേസിലും ചെങ്കോട്ടയിലും പരിസരപ്രദേശങ്ങളിലും ഇതിനായി നിരീക്ഷണങ്ങള് നടത്തിയിരുന്നു. ഇതിനായി അവര് ഉപയോഗിച്ച മൂന്ന് കാറുകള് അന്വേഷണസംഘം പിടിച്ചെടുത്തു. 2900 കിലോഗ്രാം അമോണിയം നൈട്രേറ്റ് സൂക്ഷിച്ച സ്വിഫ്റ്റ് ഡിസയര്, ആയുധങ്ങള് കണ്ടെത്തിയ ഇക്കോസ്പോര്ട് കാര്,സ്ഫോടനത്തിന് ഉപയോഗിച്ച ഹ്യൂണ്ടായ് ഐ20 എന്നിവയാണ് ഈ മൂന്ന് കാറുകള്. ഇനി ഒരു കാര് കൂടി കസ്റ്റഡിയില് എടുക്കാനുണ്ടായിരുന്നു. ആ നാലാമത്തെ കാര് ബുധനാഴ്ച അല് ഫല യൂണിവേഴ്സിറ്റി കാമ്പസില് നിന്നും കണ്ടെത്തി. മാരുതി ബ്രെസ്സ കാറാണിത്. ഭീകരസംഘത്തില് ഉള്പ്പെട്ട വനിതാ ഡോക്ടറായ ഷഹീന് ഷഹീദിന്റെ കാറാണിത്. രാസവസ്തുക്കള് പലയിടത്ത് കൊണ്ടുപോകാന് ഷഹീന് എന്ന വനിതാ ഡോക്ടര് ഈ കാര് ഉപയോഗിച്ചിരുന്നു. ഇടയ്ക്കിടെ ഡോക്ടര് ഷഹീന് ഷഹീദ് സുദീര്ഘമായ അവധികള് എടുത്തിരുന്നു. പലപ്പോഴും മൂഡൗട്ടായിരുന്നു ഈ വനിതാഡോക്ടര് എന്നും വിദ്യാര്ത്ഥികള് പറയുന്നു. ഇവരുടെ സഹായിയായ അല് ഫല യൂണിവേഴ്സിറ്റിയിലെ കംപ്യൂട്ടര് ഓപ്പറേറ്ററേയും കസ്റ്റഡിയില് എടുത്തിട്ടുണ്ട്.
ഈ ഡോക്ടര്മാര് ജോലി ചെയ്തിരുന്ന ഹരിയാനയിലെ ഫരീദാബാദിലുള്ള അല് ഫല യൂണിവേഴ്സിറ്റിയില് ഇവര് വാടകയ്ക്കെടുത്ത മുറിയില് കൂടിയാലോചനകള് പലവട്ടം നടന്നു. ഇതിന് തുര്ക്കിയില് നിന്നുള്ള ഉകാസ എന്ന രഹസ്യപ്പേരില് അറിയപ്പെടുന്ന ആള് നേതൃത്വം നല്കി. ഡോക്ടര് മുസ്സമലിന്റെ 13ാം നമ്പര് മുറിയിലാണ് ഇവര് പലപ്പോഴും ഇക്കാര്യം ചര്ച്ച ചെയ്തിരുന്നത്.
സ്ഫോടനം നടത്തിയ ദിവസം ഉമര് മുഹമ്മദ് നബി ദല്ഹി നഗരത്തില് 50 ലൊക്കേഷനുകളിലൂടെ വെളുത്ത ഹ്യൂണ്ടായ് കാറില് കടന്നുപോയിരുന്നു. കൊണോട്ട് പ്ലേസിലും മയൂര് വിഹാറിലും എല്ലാം എത്തിയ കാര് ഒടുവില് സുനേരി മുസ്ലിം പള്ളിയുടെ പാര്ക്കിംഗ് ലോട്ടില് പാര്ക്ക് ചെയ്തു. ഇവിടെ മൂന്ന് മണിക്കൂര് നേരാണ് നിര്ത്തിയിട്ടിരുന്നത്. ഈ സമയത്ത് ഇയാള് സുനേരി മുസ്ലിം പള്ളിയില് പ്രവേശിച്ചിട്ടുണ്ട്. ഇതിന്റെ മറ്റ് വിശദാംശങ്ങള് അറിയില്ല.
