തിരുവനന്തപുരം: മ്യൂസിയം വളപ്പില് അഞ്ചു പേരെ കടിച്ച നായയ്ക്ക് പേവിഷബാധ സ്ഥിരീകരിച്ചു. പരിക്കേറ്റവര് തിരുവനന്തപുരം ജനറല് ആശുപത്രിയില് നിന്ന് പേവിഷ പ്രതിരോധ കുത്തിവയ്പ് എടുത്തു. മ്യൂസിയം വളപ്പില് രാവിലെ നടക്കാന് എത്തിയവരെയാണ് തെരുവുനായ ആക്രമിച്ചത്.
മ്യൂസിയം വളപ്പിലേക്ക് ഭക്ഷണ വസ്തുക്കള് കൊണ്ടുവരുന്നതിന് വിലക്കേര്പ്പെടുത്തി.പാലോട് SIAD ല് നടത്തിയ പരിശോധനയിലാണ് പേവിഷ ബാധ സ്ഥിരീകരിച്ചത്. ജൈവ സുരക്ഷാ മേഖല ആയ മ്യൂസിയം വളപ്പില് തെരുവ് നായ ശല്യം പൂര്ണമായും ഒഴിവാക്കണമെന്ന് മൃഗശാല ഡയറക്ടറുടെ നേതൃത്വത്തില് ചേര്ന്ന അടിയന്തരയോഗം തീരുമാനിച്ചു. സുപ്രീംകോടതി നിര്ദേശ പ്രകാരം മൂസിയം വളപ്പില് തെരുവ് നായകള്ക്ക് ഭക്ഷണം നല്കുന്നവര്ക്ക് ബോധവത്കരണം നല്കാനും നിയമ നടപടികള് സ്വീകരിക്കാനും തീരുമാനിച്ചു.
പേ വിഷ ബാധയുളള തെരുവ് നായയുടെ കടിയേറ്റ മറ്റുള്ള നായ്ക്കളെ തിരുവനന്തപുരം കോര്പറേഷന് എ ബി സി സംഘം പിടികൂടി 21 ദിവസത്തെ ക്വാറന്റൈനിലേക്ക് മാറ്റി. ഇവയ്ക്ക് വാക്സിന് നല്കും.
