തൃശ്ശൂര്: ഗുരുവായൂര് ക്ഷേത്രത്തിലെത്തി കണ്ണനെ കണ്ടു തൊഴുത് കാണിക്കയര്പ്പിച്ച്, ദര്ശന പുണ്യം നേടി റിലയന്സ് ഇന്ഡസ്ട്രീസ് ചെയര്മാന് മുകേഷ് അംബാനി. ദേവസ്വം മള്ട്ടി സ്പെഷ്യാലിറ്റി ആശുപത്രിക്കായി ആദ്യ ഗഡു സംഭാവനയായി 15 കോടി രൂപയുടെ ചെക്ക് അദ്ദേഹം ദേവസ്വത്തിന് കൈമാറി. പൊതു അവധി ദിനത്തില് സ്പെഷ്യല് ദര്ശന നിയന്ത്രണം ഉള്ളതിനാല് 25 പേര്ക്കായി ശ്രീകോവില് നെയ്യ് വിളക്ക് വഴിപാട് ശീട്ടാക്കിയാണ് മുകേഷ് അംബാനി ക്ഷേത്രത്തിൽ പ്രവേശിച്ചത്.
ദേവസ്വത്തിന്റെ നിര്ദ്ദിഷ്ട മള്ട്ടിസ് പെഷ്യാലിറ്റി ആശുപത്രിയടെ രൂപരേഖയും ആനകളുടെ പരിചരണത്തിനായി ദേവസ്വം തുടങ്ങാന് ലക്ഷ്യമിടുന്ന ആധുനിക മൃഗാശുപത്രിയുടെ പദ്ധതി രേഖയും ദേവസ്വം ചെയര്മാന് ഡോ. വി.കെ.വിജയന്, ഭരണ സമിതി അംഗം സി. മനോജ് എന്നിവര് മുകേഷ് അംബാനിക്ക് സമര്പ്പിച്ചു. ആശുപത്രി നിര്മ്മാണത്തിനായി 15 കോടിയുടെ ചെക്ക് അദ്ദേഹം കൈമാറി. ഗുജറാത്തില് റിലയന്സ് ഉടമസ്ഥതയിലുള്ള വന്താര വന്യ ജീവി പരിപാലന കേന്ദ്രത്തിന്റെ പ്രവര്ത്തന മാതൃകയില് ദേവസ്വത്തിലെ ആനകള്ക്ക് മികച്ച പരിപാലനം നല്കാന് അവസരം ഒരുക്കാമെന്നും അദ്ദേഹം ഉറപ്പ് നല്കി.
