പത്തനംതിട്ട: ശബരിമല സ്വര്ണക്കൊള്ളയില് ഹൈക്കോടതി ഉന്നയിച്ച സംശയങ്ങളുടെ അടിസ്ഥാനത്തില് എസ്ഐടി അന്വേഷണം പുതിയ തലങ്ങളിലേക്ക്. ഇപ്പോള് തിരുച്ചിറപ്പള്ളി സെന്ട്രല് ജയിലിലുള്ള അന്താരാഷ്ട്ര വിഗ്രഹ കടത്തുകാരന് സുഭാഷ് കപൂറിന്റെ മോഷണ രീതിയോട് ശബരിമല സ്വര്ണക്കൊള്ളയെ ഹൈക്കോടതി സാമ്യപ്പെടുത്തിയ സാഹചര്യത്തില് ഉണ്ണികൃഷ്ണന് പോറ്റിയുടെ വിദേശ യാത്രകള് അന്വേഷിക്കാനൊരുങ്ങുകയാണ് എസ്ഐടി.
യുഎഇ അടക്കമുള്ള ചില രാജ്യങ്ങളില് പോറ്റി പോയിട്ടുണ്ടെന്നാണ് വിവരം. യുഎഇ കേന്ദ്രമാക്കിയാണ് അന്താരാഷ്ട്ര വിഗ്രഹക്കടത്തുകള് പലതും നടക്കുന്നത്. അതിനാല് എന്തിനായിരുന്നു പോറ്റിയുടെ വിദേശ യാത്രകളെന്നതില് വ്യക്തത വരുത്തണം.
സന്നിധാനത്തെ കട്ടിളപ്പാളികള്, ദ്വാരപാലക ശില്പ പാളികള് എന്നിവയുടെ കാലപ്പഴക്കം നിര്ണയിക്കാന് ശാസ്ത്രീയ പരീക്ഷണങ്ങള്ക്കും തീരുമാനിച്ചിട്ടുണ്ട്. പഴയ ചെമ്പുപാളിയിലാണൊ സ്വര്ണം പൂശിയതെന്നു കണ്ടെത്താനാണിത്. പുതിയതിലാണ് പൂശിയതെങ്കില് പഴയത് കടല് കടത്താന് സാധ്യതയേറെയാണ്. ഇതിനു പുറമേ പൂശിയ സ്വര്ണത്തിന്റെ മാറ്റും പരിശോധിക്കും.
ദേവസ്വം ഉന്നതര് പോറ്റിയുടെ ആതിഥേയത്വം സ്വീകരിച്ചിട്ടുണ്ടോയെന്ന സംശയവും ഹൈക്കോടതി കഴിഞ്ഞ ദിവസമുന്നയിച്ചിരുന്നു. പോറ്റിയുടെ വെഞ്ഞാറമ്മൂട് പുളിമാത്തെ വീട്ടില് മന്ത്രി കടകംപള്ളി സുരേന്ദ്രന്, ദേവസ്വം ബോര്ഡ് പ്രസിഡന്റ്, അംഗങ്ങള്, ദേവസ്വം കമ്മിഷണര് തുടങ്ങിയവര് നിരവധി തവണ സന്ദര്ശിച്ചതായി ജന്മഭൂമി നേരത്തേ റിപ്പോര്ട്ട് ചെയ്തിരുന്നു. കൂടാതെ കാരേറ്റെ ബാര് ഹോട്ടലില് പോറ്റിയുടെ സ്ഥിരം മുറിയില് അതിഥിയായും ഇവരെത്തിയിരുന്നു. പോറ്റിയുടെ അടുത്ത ബന്ധുവിന്റെ വിവാഹ സല്ക്കാരത്തില് പങ്കെടുക്കാന് ദേവസ്വം ബോര്ഡ് ഉന്നതോദ്യോഗസ്ഥരും ബോര്ഡ് ഭാരവാഹികളുമെത്തിയതും പുറത്തുവന്നതാണ്. എന്നിട്ടും ഇക്കാര്യങ്ങളിലേക്ക് എസ്ഐടി അന്വേഷണമെത്തിയിട്ടില്ല.
ശബരിമല ശ്രീകോവിലിന്റെ 315 പവന് സ്വര്ണം പൊതിഞ്ഞ വാതിലുകള് സ്ട്രോങ് റൂമില് സുരക്ഷിതമായുണ്ടോയെന്നറിയാന് അമിക്കസ് ക്യൂറി റിപ്പോര്ട്ട് വരുംവരെ കാത്തിരിക്കണം. എന്നാല് ഇപ്പോള് സന്നിധാനത്ത് തങ്ങുന്ന എസ്ഐടി ഉദ്യോഗസ്ഥര് വാതില്പ്പാളികള് കണ്ടെത്താന് സ്ട്രോങ് റൂമില് തിരയുമെന്നറിയുന്നു.
ജന്മഭൂമി ഓണ്ലൈന്