ഇടുക്കി :അടിമാലി കൂമ്പന്പാറയിലെ മണ്ണിടിച്ചില് ദുരിത ബാധിതര് ദുരിതാശ്വാസ ക്യാമ്പ് വിടാന് തയാറാകാതെ പ്രതിഷേധത്തില്. ക്യാമ്പ് വിട്ടവര്ക്ക് അടിയന്തിര സഹായം ലഭിച്ചില്ലെന്ന് പരാതി. ജില്ലാ കളക്ടര് നല്കിയ ഉറപ്പ് പാഴായെന്ന് ദുരിതബാധിതര് പറഞ്ഞു.
25 കുടുംബങ്ങളെ നേരത്തെ അവര് താമസിച്ചിരുന്ന വീടുകളിലേക്കും ബാക്കിയുള്ള മുപ്പതോളം ആളുകളെ പുനഃരധിവാസ കേന്ദ്രങ്ങളിലേക്കും മാറ്റുമെന്നാണ് ജില്ലാ കളക്ടര് പറഞ്ഞിരുന്നത്. 12000 രൂപ മാസവാടകയുള്ള വീടുകള് ദുരിത ബാധിതര്ക്ക് വാടകയ്ക്ക് എടുക്കാമെന്നും കളക്ടര് ഉറപ്പു നല്കി. സ്വന്തം വീടുകളിലേക്ക് മടങ്ങുന്ന 25 കുടുംബങ്ങള്ക്ക് പതിനായിരം രൂപ അടിയന്തിര സഹായമായി നല്കുമെന്നും കളക്ടര് ഉറപ്പു നല്കിയിരുന്നെങ്കിലും ഇതൊന്നും പാലിക്കപ്പെട്ടില്ലെന്ന് ദുരന്ത ബാധിതര് പറയുന്നു. സഹായം പിന്നീട് ലഭ്യമാക്കുമെന്നായിരുന്നു എന് എച്ച് എ ഐയുടെ പ്രതികരണം.
25 ഓളം വരുന്ന കുടുംബങ്ങള് തിരികെ അവരുടെ വീടുകളിലേക്ക് തന്നെ പോയെങ്കിലും പണം അക്കൗണ്ടുകളിലേക്ക് പിന്നീട് വരുമെന്നാണ് എന് എച്ച് എ ഐയില് നിന്ന് ദുരന്തബാധിതര്ക്ക് കിട്ടിയ അറിയിപ്പ്. എന്നാല് വീടുകള് പൂര്ണമായും മണ്ണിനടിയിലായവരോട് തൊട്ടടുത്തുള്ള മാര് ബസേലിയസ് കോളേജിലേക്ക് താത്കാലികമായി മാറാനാണ് നിര്ദേശം.
