തിരുവനന്തപുരം: ഭാരതത്തിന്റെ ഐക്യത്തിനായി മലയാളിയായ വി.പി. മേനോന് വഹിച്ച പങ്ക് നിസ്തുലവും അവിസ്മരണീയവുമാണെന്ന് ഗവര്ണര് രാജേന്ദ്ര വിശ്വനാഥ് ആര്ലേക്കര് പറഞ്ഞു.
കേരളപ്പിറവി ദിനാഘോഷങ്ങളുടെ ഭാഗമായി രാജ്ഭവനില് സംഘടിപ്പിച്ച ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നാട്ടുരാജ്യങ്ങളെ ഇന്ത്യന് യൂണിയനിലേക്കു കൂട്ടിച്ചേര്ക്കുന്നതില് സര്ദാര് വല്ലഭായി പട്ടേലിനൊപ്പം പ്രവര്ത്തിച്ച പ്രധാന വ്യക്തിയായിരുന്നു വി.പി. മേനോന്. അന്നത്തെ നാട്ടുരാജാക്കന്മാരുമായി നേരിട്ടുള്ള സംവാദത്തിലൂടെ അവരുടെ ആശങ്കകള് പരിഹരിച്ച് ദേശീയ മുഖ്യധാരയിലേക്ക് കൊണ്ടുവരുന്നതില് മേനോന് നടത്തിയ ശ്രമങ്ങള് അതുല്യമാണ് എന്ന് ഗവര്ണര് ഓര്മ്മപ്പെടുത്തി.
മലയാളികള് എല്ലാ മേഖലകളിലും നേതൃപാടവം തെളിയിച്ചിട്ടുണ്ടെന്നും, ഒരിടത്തും പിന്നിലല്ലെന്നും ഗവര്ണര് പറഞ്ഞു. സാംസ്കാരിക തനിമയും മൂല്യങ്ങളും സംരക്ഷിച്ചുകൊണ്ട് മുന്നേറുന്ന മലയാളികള് രാജ്യത്തിനാകെ മാതൃകയാണെന്നും, ദേശീയ ഗതിവിഗതികള് നിര്ണയിക്കുന്നതില് കേരളത്തിന് എന്നും നിര്ണായക സ്ഥാനം ഉണ്ടെന്നും അദ്ദേഹം കൂട്ടിച്ചേര്ത്തു.
“വികസിത ഭാരതത്തിലേക്കുള്ള പാത വികസിത കേരളത്തിലൂടെയാണ്,” എന്ന് ഗവര്ണര് വ്യക്തമാക്കി. രാഷ്ട്രനിര്മ്മാണപ്രക്രിയയില് ഓരോ പൗരനും പങ്കാളികളാകണമെന്ന് അദ്ദേഹം ആഹ്വാനം ചെയ്തു. “സര്ക്കാരുകള് തങ്ങളുടെ ഭാഗം ചെയ്യുമ്പോള് ജനങ്ങള് കാഴ്ചക്കാര് മാത്രമായി നില്ക്കുന്നത് ശരിയല്ല,” അദ്ദേഹം പറഞ്ഞു.
കേരളപ്പിറവി ആഘോഷങ്ങളുടെ ഭാഗമായി കേരള കലാമണ്ഡലത്തിലെ കലാകാരന്മാരും രാജ്ഭവന് ജീവനക്കാരുടെയും കുടുംബാംഗങ്ങളും അവതരിപ്പിച്ച വിവിധ കലാപരിപാടികള് ആഘോഷത്തിന് നിറവും പകിട്ടും പകര്ന്നു.
