കൊച്ചി: സിപിഎം സംസ്ഥാന സെക്രട്ടറി എം.വി. ഗോവിന്ദനും മകനുമെതിരെ ആരോപണമുയര്ത്തിയ വ്യവസായി മുഹമ്മദ് ഷര്ഷാദ് സാമ്പത്തിക തട്ടിപ്പ് കേസില് അറസ്റ്റില്. 40 ലക്ഷം രൂപ തട്ടിച്ചു എന്ന കൊച്ചി സ്വദേശികളുടെ പരാതിയിലാണ് നടപടി.
കൊച്ചി സൗത്ത് പൊലീസ് ചെന്നൈയില് നിന്നാണ് മുഹമ്മദ് ഷര്ഷാദിനെ അറസ്റ്റ് ചെയ്തത്. ഷര്ഷാദ് ഡയറക്ടറായ കമ്പനിയില് ലാഭവിഹിതവും ഓഹരിപങ്കാളിത്തവും വാഗ്ദാനം ചെയ്ത് നിക്ഷേപതട്ടിപ്പ് നടത്തിയെന്നാണ് പരാതി.
കമ്പനി സിഇഒയായ തമിഴ്നാട് സ്വദേശിയും ഈ കേസില് പ്രതിയാണ്.മുഹമ്മദ് ഷര്ഷാദിനെ രാത്രി കൊച്ചിയില് എത്തിക്കും.
സിപിഎം സംസ്ഥാന സെക്രട്ടറി എം.വി. ഗോവിന്ദനും മകനുമെതിരെ ഗുരുതര ആരോപണങ്ങളുന്നയിച്ച് മുഹമ്മദ് ഷര്ഷാദ് പൊളിറ്റ് ബ്യൂറോയ്ക്ക് അയച്ച കത്ത് വിവാദമായിരുന്നു.യുകെ വ്യവസായി രാജേഷ് കൃഷ്ണയും സിപിഎമ്മിലെ ഉന്നത നേതാക്കളും തമ്മില് അനധികൃത ഇടപാടുകള് നടത്തിയെന്നാരോപിച്ചാണ് ഷര്ഷാദ് പി ബിക്ക് കത്തു നല്കിയത്.
സിപിഎം നേതാക്കളുടെ ബിനാമിയാണ് രാജേഷ് കൃഷ്ണ എന്ന് കത്തിലുണ്ടായിരുന്നു. ആരോപണങ്ങള്ക്ക് പിന്നാലെ എം.വി. ഗോവിന്ദന്, തോമസ് ഐസക്ക് ഉള്പ്പെടെയുള്ളവര് ഷര്ഷാദിനെതിരെ വക്കീല് നോട്ടീസയച്ചിരുന്നു.
