കൊച്ചി: കലൂര് സ്റ്റേഡിയം നവീകരണവുമായി ബന്ധപ്പെട്ട വിഷയത്തില് ജിസിഡിഎ ഒളിച്ചുകളിക്കുന്നു. മെസിയും അര്ജന്റീന ടീമും എത്തുന്നുവെന്ന് പ്രചരിപ്പിച്ചാണ് വിവാദപുരുഷനായ സ്പോണ്സര് സ്റ്റേഡിയത്തിലെ വൃക്ഷങ്ങള് വെട്ടിമാറ്റുകയും നിര്മാണ പ്രവൃത്തികള് ആരംഭിക്കുകയും ചെയ്തത്. 70 കോടിയുടെ നവീകരണ പ്രവര്ത്തനങ്ങളാണ് നടത്തുന്നതെന്നാണ് സ്പോണ്സര് അവകാശപ്പെട്ടത്. എന്നാല് സ്പോണ്സറുമായി യാതൊരു ബന്ധവുമില്ലെന്ന വാദവുമായിട്ടാണ് ജിസിഡിഎ രംഗത്തെത്തിയിരിക്കുന്നത്.
സ്റ്റേഡിയം നവീകരണം സംബന്ധിച്ച് സ്പോണ്സറുമായി കരാറില്ലെന്ന് ജിസിഡിഎ ചെയര്മാന് കെ. ചന്ദ്രന് പിള്ള ഇന്നലെ പറഞ്ഞത്. പൊതുമേഖലാ സ്ഥാപനമായ സ്പോര്ട്സ് കേരള ഫൗണ്ടേഷനാണ് ജിസിഡിഎ കരാര് നല്കിയിരിക്കുന്നതെന്നാണ് ചെയര്മാന് പറയുന്നത്.
ഐഎഎസ് ഉദ്യോഗസ്ഥനായ വിഷ്ണുരാജാണ് സ്ഥാപനത്തിന്റെ എംഡി. ചെയ്യുന്ന പ്രവൃത്തികളെല്ലാം കൃത്യമായി നിരീക്ഷിക്കാന് മോണിറ്ററിങ് കമ്മിറ്റിയുണ്ട്. സ്പോണ്സര് 70 കോടി എന്ന് പറഞ്ഞാല് അതില് ഉത്തരവാദിത്തമില്ലെന്നും ചന്ദ്രന് പിള്ള പറഞ്ഞു. ഫലത്തില് കാര്യങ്ങളെല്ലാം സ്പോര്ട്സ് കേരള ഫൗണ്ടേഷന്റെ തലയില് വച്ച് കൈകഴുകുകയാണ് ജിസിഡിഎ ചെയ്തത്.
സ്റ്റേഡിയത്തില് ചുറ്റുമതിലിന്റെ ആവശ്യമുണ്ടായിരുന്നു. ചുറ്റുമതില് അവര് നിര്മിക്കാമെന്നാണ് ധാരണയായത്. അതുമായി ബന്ധപ്പെട്ടാണ് കുറച്ച് മരം മുറിച്ചത്. മരം മുറിച്ചതെല്ലാം അനുവാദത്തോടുകൂടിയാണ്. അല്ലാതെ എന്തെങ്കിലും നടന്നിട്ടുണ്ടെങ്കില് അത് പ്രത്യേകമായി പരിശോധിക്കുമെന്നാണ് ചെയര്മാന് പറയുന്നത്.
ചുരുങ്ങിയ ദിവസങ്ങള്ക്കുള്ളില് സ്റ്റേഡിയത്തിലെ പ്രവൃത്തികള് പൂര്ത്തിയാക്കാന് വേണ്ടി ജിസിഡിഎ സ്റ്റേഡിയം കൈമാറി. ജിസിഡിഎ നേരിട്ട് പണം മുടക്കുന്നില്ല. അത് ചെയ്യുന്നത് സ്പോര്ട്സ് കേരള ഫൗണ്ടേഷന് വഴിയാണ്. ജിസിഡിഎക്ക് സ്പോര്ട്സ് കേരള ഫൗണ്ടേഷനുമായിട്ടാണ് കരാര്. സ്റ്റേഡിയത്തില് നടക്കുന്ന പ്രവൃത്തികള് ഓരോന്നും എത്രത്തോളമാണെന്ന് വിലയിരുത്തി ഒരു റിപ്പോര്ട്ട് ഉണ്ടാക്കാന് മൂന്നു പേരുടെ ഒരു കമ്മിറ്റിയെ വെച്ചിട്ടുണ്ട്. ജിസിഡിഎയുടെ സൂപ്രണ്ടിങ് എന്ജിനീയര്, എസ്കെഎഫിന്റെ ജനറല് മാനേജര്, റിപ്പോര്ട്ടര് ബ്രോഡ്കാസ്റ്റിങ് കോര്പറേഷന്റെ സീനിയര് എന്ജിനീയര് എന്നിവരടങ്ങുന്നതാണ് കമ്മിറ്റി.
ഈ മൂന്നുപേരും അവിടെ നടക്കുന്ന പ്രവൃത്തികളുടെ റിപ്പോര്ട്ട് ദിവസേന തയാറാക്കുന്നുണ്ടെന്നും ചന്ദ്രന് പിള്ള പറയുന്നു. ഫലത്തില് സ്റ്റേഡിയം നവീകരണം സംബന്ധിച്ച ക്രമക്കേടുകളില് നിന്നും കൈകഴുകാനുള്ള ശ്രമമാണ് ജിസിഡിഎ നടത്തുന്നതെന്നാണ് ആക്ഷേപം.
