പാലാ: പാലായില് പഠനം നടത്തുന്ന വിദ്യാര്ത്ഥിയെ നാല്വര് സംഘം മര്ദ്ദിച്ചു. ഗുരുതരമായി പരിക്കേറ്റ വിദ്യാര്ത്ഥിയെ പാലാ ജനറല് ആശുപത്രിയില് പ്രവേശിപ്പിച്ചു.
ഇടമറ്റം മുകളേല്പീടിക ഈഴവര് മറ്റത്തില് ബിനോയിയുടെ മകന് ജിബിനാണ്(18) ഗുണ്ടകളുടെ ആക്രമണത്തില് പരിക്കേറ്റത്.
ഇന്നലെ രാവിലെ 9.15 ഓടെ പാലായിലാണ് സംഭവം. ഇടമറ്റം പ്ലാത്തറയില് ബിനോയുടെ നേതൃത്വത്തിലുള്ള സംഘമാണ് ആക്രമിച്ചതെന്ന് ജിബിന് പറഞ്ഞു. ജിബിന്റെ അയല്വാസിയാണ് ബിനോ, രാവിലെ ജിബിന്റെ അമ്മയെ അസഭ്യം പറഞ്ഞത് ജിബിന് തടയുകയും അസഭ്യം പറയരുതെന്ന് ആവശ്യപ്പെടുകയും ചെയ്തിരുന്നു.
പിന്നീട് പാലായില് ജിബിന് പഠിക്കുന്ന ട്രോണിക്സ് എന്ന സ്വകാര്യ വിദ്യാഭ്യാസ സ്ഥാപനത്തിലേക്ക് വരുന്ന വഴി സ്ഥാപനത്തിന് സമീപത്തുവെച്ച് ബിനോയുടെ നേതൃത്വത്തിലുള്ള സംഘം കമ്പിവടിയും മാരകായുധങ്ങളും ഉപയോഗിച്ച് ആക്രമിക്കുകയായിരുന്നു.
കാല്മുട്ടിനും തലക്കും അടിയേറ്റ ജിബിന് താന് പഠിക്കുന്ന സ്ഥാപനത്തിലേക്ക് ഓടിക്കയറിയതിനാല് കൂടുതല് പരിക്കേല്ക്കാതെ രക്ഷപ്പെട്ടു. സ്ഥാപനത്തിലെ അധ്യാപകര് ചേര്ന്നാണ് ജിബിനെ ജനറല് ആശുപത്രിയില് എത്തിച്ചത്. ആശുപത്രി അധികൃതര് അറിയിച്ചതനുസരിച്ച് പോലീസ് കേസെടുത്ത് അന്വേഷണം ആരംഭിച്ചു.
