വിജയവാഡ : ബംഗാൾ ഉൾക്കടലിൽ രൂപം കൊണ്ട മന്ഥ ചുഴലിക്കാറ്റ് ആന്ധ്രാപ്രദേശിലെ കാക്കിനടയ്ക്കും മച്ചിലിപട്ടണത്തിനും ഇടയിലുള്ള തീരത്ത് ആഞ്ഞടിച്ചു. ഇത് തീരപ്രദേശങ്ങളിലെ നൂറുകണക്കിന് വീടുകൾക്കും മരങ്ങൾക്കും വ്യാപകമായ നാശനഷ്ടമുണ്ടാക്കി. സംസ്ഥാനത്തെ ഗൊൺസീമ ജില്ലയിൽ മരം കടപുഴകി വീണ് ഒരു യുവതി മരിച്ചു. വ്യോമ, റെയിൽ സർവീസുകളെയും ചുഴലിക്കാറ്റ് സാരമായി ബാധിച്ചു.
അതേസമയം ചുഴലിക്കാറ്റ് ഇപ്പോൾ വടക്കോട്ടും വടക്ക് പടിഞ്ഞാറോട്ടും നീങ്ങുന്നതായി കാലാവസ്ഥ കേന്ദ്രം അറിയിച്ചു. ആന്ധ്രാപ്രദേശ്, തമിഴ്നാട്, ഒഡീഷ, പശ്ചിമ ബംഗാൾ എന്നിവിടങ്ങളിലെ നിരവധി ജില്ലകളിൽ ശക്തമായ കാറ്റിനൊപ്പം കനത്ത മഴയും അനുഭവപ്പെടുന്നുണ്ട്. കൊടുങ്കാറ്റിന്റെ ആഘാതം ഏറ്റവും കൂടുതൽ ആഞ്ഞടിച്ചത് ആന്ധ്രാപ്രദേശിലാണ്. ചുഴലിക്കാറ്റ് തീരത്ത് ആഞ്ഞടിച്ചപ്പോൾ കാറ്റിന്റെ വേഗത മണിക്കൂറിൽ 100 മുതൽ 110 കിലോമീറ്റർ വരെയായിരുന്നു.
പശ്ചിമ ബംഗാളിലും മന്ഥ ചുഴലിക്കാറ്റ് ഭീഷണി നിലനിൽക്കുന്നുണ്ട്. 24 പർഗാനാസ്, മേദിനിപൂർ, ബിർഭം എന്നിവയുൾപ്പെടെ നിരവധി ജില്ലകളിൽ കനത്ത മഴയും മലയോര പ്രദേശങ്ങളിൽ മണ്ണിടിച്ചിലും ഉണ്ടാകുമെന്ന് പ്രതീക്ഷിക്കുന്നുണ്ട്. ഡാർജിലിംഗ്, കലിംപോങ്, അലിപുർദുവാർ, കൂച്ച് ബെഹാർ ജില്ലകളിൽ ഒക്ടോബർ 31 വരെ കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഒഡീഷയിൽ, ദേശീയ ദുരന്ത നിവാരണ സേന 140 രക്ഷാ സംഘങ്ങളെയും 5,000-ത്തിലധികം ഉദ്യോഗസ്ഥരെയും വിന്യസിച്ചിട്ടുണ്ട്. സംസ്ഥാനത്തെ ഒമ്പത് ജില്ലകളിലെ സ്കൂളുകളും അംഗൻവാടികളും ഒക്ടോബർ 30 വരെ അടച്ചിരിക്കും. സർക്കാർ ജീവനക്കാരുടെ അവധി റദ്ദാക്കിയിട്ടുണ്ട്.
കൂടാതെ കടൽക്ഷോഭം വർദ്ധിച്ചതിനാൽ ഒഡീഷയിലെ ഗോപാൽപുർ തുറമുഖത്ത് ആളുകളുടെ നീക്കം നിർത്തിവച്ചിരിക്കുന്നു. ജനങ്ങളോട് വീടിനുള്ളിൽ തന്നെ തുടരാൻ ആവശ്യപ്പെട്ടിട്ടുണ്ട്, നിരവധി ജില്ലകളിൽ റെഡ് അലേർട്ട് പുറപ്പെടുവിച്ചിട്ടുണ്ട്. മൽക്കൻഗിരി, കോരാപുട്ട്, നബരംഗ്പൂർ, റായ്ഗഡ്, ഗഞ്ചപതി, ഗഞ്ചം, കലഹണ്ടി, കാണ്ഡമാൽ എന്നിവ കൊടുങ്കാറ്റിനെ നേരിടാൻ പൂർണ്ണമായും സജ്ജമാണ്.
അതേ സമയം ചുഴലിക്കാറ്റിന്റെ പശ്ചാത്തലത്തിൽ സൗത്ത് സെൻട്രൽ റെയിൽവേ സോണിലെ 120 ട്രെയിനുകളും 52 വിമാന സർവീസുകളും റദ്ദാക്കി. ചുഴലിക്കാറ്റിന്റെ ആഘാതം ലഘൂകരിക്കുന്നതിനായി ആന്ധ്രാപ്രദേശ് സർക്കാർ 22 ജില്ലകളിലായി 3,174 ഷെൽട്ടർ ഹോമുകൾ സ്ഥാപിച്ചിട്ടുണ്ട്. കൂടാതെ ആന്ധ്രാപ്രദേശിലെ വിശാഖപട്ടണം, വിജയവാഡ, തിരുപ്പതി വിമാനത്താവളങ്ങളിൽ നിന്നുള്ള 52 വിമാനങ്ങൾ റദ്ദാക്കി. സൗത്ത് സെൻട്രൽ റെയിൽവേ സോണിൽ നിന്നുള്ള 120 ട്രെയിനുകളും റദ്ദാക്കി.
