കൊച്ചി: ഒരു ബംഗാളി നടിയുടെ മാന്യതയെ അപമാനിച്ചെന്നാരോപിച്ച് മലയാള ചലച്ചിത്ര നിര്മാതാവും സംവിധായകനുമായ രഞ്ജിത്തിനെതിരെയുള്ള കേസ് ഹൈക്കോടതി റദ്ദാക്കി. എറണാകുളം അഡീ. ചീഫ് ജുഡീഷ്യല് മജിസ്ട്രേറ്റ് കോടതിയിലെ കേസും തുടര് നടപടികളും റദ്ദാക്കണമെന്ന് ആവശ്യപ്പെട്ട് രഞ്ജിത്ത് സമര്പ്പിച്ച ഹര്ജിയിലാണ് ജസ്റ്റിസ് ജി. ഗിരീഷിന്റെ ഉത്തരവ്. സിനിമാ മേഖലയിലെ സ്ത്രീകളുടെ തൊഴില് സാഹചര്യങ്ങളെക്കുറിച്ചുള്ള ജസ്റ്റിസ് കെ. ഹേമ കമ്മിറ്റി റിപ്പോര്ട്ടിന്റെ പ്രധാന ഭാഗം 2024 ഓഗസ്റ്റില് പുറത്തുവന്നതിനെത്തുടര്ന്ന് രഞ്ജിത്തിനെതിരെ ഉന്നയിച്ച ആരോപണങ്ങളില് നിന്നാണ് കേസ് ഉണ്ടായത്.
2009-ല് ‘പാലേരിമാണിക്യം: ഒരു പാതിരകൊലപാതകത്തിന്റെ കഥ’ എന്ന സിനിമയില് അഭിനയിക്കാന് രഞ്ജിത്ത് തന്നെ ക്ഷണിച്ചെന്നും കൊച്ചിയിലെ ഒരു ഫ്ളാറ്റില് സിനിമാ ചര്ച്ചയ്ക്കിടെ തന്നോട് മോശമായി പെരുമാറിയെന്നുമാണ് നടിയുടെ ആരോപണം. വാദങ്ങള് പരിഗണിച്ച ബെഞ്ച്, ആരോപിക്കപ്പെട്ട സംഭവം നടന്ന തീയതിയില് ബാധകമായ ഐപിസി 354, 509 വകുപ്പുകള് പ്രകാരമുള്ള കുറ്റകൃത്യങ്ങള്ക്കുള്ള പരമാവധി ശിക്ഷ രണ്ട് വര്ഷം മാത്രമായതിനാല്, സെക്ഷന് 468 സിആര്പിസി പ്രകാരമുള്ള പരിമിതി കുറ്റകൃത്യം ചെയ്ത തീയതി മുതല് മൂന്ന് വര്ഷമാണെന്ന് കോടതി നിരീക്ഷിച്ചു. 15 വര്ഷം പഴക്കമുള്ള കുറ്റകൃത്യത്തിന് ഇപ്പോള് മജിസ്ട്രേറ്റ് കേസ് എടുക്കുന്നതില് ന്യായീകരണമില്ലെന്ന് കോടതി വിലയിരുത്തി. അതനുസരിച്ച്, കേസ് റദ്ദാക്കി.
