ന്യൂദല്ഹി: കേന്ദ്ര വിവരാവകാശ കമ്മീഷനിലേക്കുള്ള നിയമനത്തിനായി ഷോര്ട്ട്ലിസ്റ്റ് ചെയ്തവരുടെ പേരുകള് പരസ്യമായി വെളിപ്പെടുത്തണമെന്ന ആവശ്യം സുപ്രീം കോടതി തളളി. ഈ ഘട്ടത്തില് കേന്ദ്ര സര്ക്കാരിനോട് അക്കാര്യം നിര്ദ്ദേശിക്കാനാവില്ലെന്ന് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ ബെഞ്ച് വ്യക്തമാക്കി.
കേന്ദ്ര, സംസ്ഥാന വിവരാവകാശ കമ്മീഷനുകളിലേക്കുള്ള നിയമനങ്ങളിലെ കാലതാമസം ചൂണ്ടിക്കാട്ടി അഭിഭാഷകന് പ്രശാന്ത് ഭൂഷണ് മുഖേന ആക്ടിവിസ്റ്റ് അഞ്ജലി ഭരദ്വാജ് സമര്പ്പിച്ച പൊതുതാല്പ്പര്യ ഹര്ജിയിലാണ് കോടതി ഉത്തരവ്. സെലക്ഷന് പ്രക്രിയയുടെ ഓരോ ഘട്ടത്തിലും കോടതി ഇടപെടല് ഉണ്ടായാല് സര്ക്കാരിന്റെ പ്രവര്ത്തനത്തെ അതു തടസ്സപ്പെടുത്തുമെന്ന് ജസ്റ്റിസ് സൂര്യകാന്ത് നിരീക്ഷിച്ചു.
സെര്ച്ച് കമ്മിറ്റി പേരുകള് ഷോര്ട്ട്ലിസ്റ്റ് ചെയ്തിട്ടുണ്ടെന്നും പ്രധാനമന്ത്രി, പ്രതിപക്ഷ നേതാവ്, പ്രധാനമന്ത്രി നാമനിര്ദ്ദേശം ചെയ്യുന്ന ഒരു കേന്ദ്രമന്ത്രി എന്നിവരടങ്ങുന്ന സെലക്ഷന് കമ്മിറ്റിയാണ് നിയമനങ്ങള് നടത്തുന്നതെന്നും അഡീഷണല് സോളിസിറ്റര് ജനറല് കെ.എം. നടരാജ് ബെഞ്ചിനെ അറിയിച്ചു. രണ്ടോ മൂന്നോ ആഴ്ചകള്ക്കുള്ളില് മുഴുവന് നിയമന പ്രക്രിയയും പൂര്ത്തിയാകുമെന്നും അദ്ദേഹം ഉറപ്പ് നല്കി. യോഗ്യതയില്ലാത്ത ആരെയെങ്കിലും നിയമിച്ചാല് നിയമനത്തിന് ശേഷം കോടതിക്ക് അത് പരിശോധിക്കാമെന്ന് അദ്ദേഹം പറഞ്ഞു.
വിവരാവകാശ കമ്മിഷന് നിയമനം: ‘കേന്ദ്രസര്ക്കാരിനെ സംശയിക്കാന് കാരണമൊന്നുമില്ല’, പ്രശാന്ത് ഭൂഷന്റെ വാദം തള്ളി സുപ്രീം കോടതി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.