മഹാസഖ്യത്തിന്റെ തിരഞ്ഞെടുപ്പ് പ്രകടന പത്രികയിൽ ഉള്ളത് മലർ പൊടിക്കാരന്റെ സ്വപ്നങ്ങൾ മാത്രം ; വാഗ്ദാനങ്ങൾ പാലിക്കുന്നില്ലെങ്കിൽ പിന്നെ എന്തിന് പത്രിക ? 

പട്ന : ബീഹാറിലെ മഹാസഖ്യത്തിന്റെ തിരഞ്ഞെടുപ്പ് പ്രകടന പത്രിക ഒക്ടോബർ 28 ചൊവ്വാഴ്ച പ്രഖ്യാപിക്കും. ഘടകകക്ഷി നേതാക്കളുടെ സാന്നിധ്യത്തിൽ തേജസ്വി പ്രസാദ് യാദവ് പത്രിക അവതരിപ്പിക്കും. ഓരോ കുടുംബത്തിൽ നിന്നും ഒരാൾക്ക് സർക്കാർ ജോലി നൽകുമെന്ന പ്രഖ്യാപനത്തിന് മഹാസഖ്യത്തിന്റെ തിരഞ്ഞെടുപ്പ് പ്രകടന പത്രികയിൽ മുൻ‌തൂക്കം നൽകുന്നത്.

സംവരണ പരിധി വർദ്ധിപ്പിക്കുമെന്ന വാഗ്ദാനവും ഉണ്ടാകും. മായ്-ബെഹൻ യോജന പ്രകാരം സ്ത്രീകൾക്ക് 2,500 രൂപയും ജീവിക ദീദികൾക്ക് 2,000 രൂപയും പ്രതിമാസ അലവൻസും കമ്മ്യൂണിറ്റി കോർഡിനേറ്റർമാരുടെ (സിഎം) സ്ഥിരം ജോലിയും പ്രകടന പത്രികയിൽ ഉൾപ്പെടുന്നു.

മഹാസഖ്യ നേതാക്കളായ രാഹുൽ ഗാന്ധിയും തേജസ്വി യാദവും ആദ്യ ഘട്ട വോട്ടെടുപ്പിന് മുമ്പ് സംയുക്ത റാലികളെ അഭിസംബോധന ചെയ്യും. രണ്ടാം ഘട്ടത്തിലേക്ക് പോകുന്ന സീറ്റുകളിലേക്കുള്ള സംയുക്ത റാലികളെ ഇരു നേതാക്കളും പിന്നീട് അഭിസംബോധന ചെയ്യും. പ്രിയങ്ക വാദ്രയും മല്ലികാർജുൻ ഖാർഗെയും ഒക്ടോബർ 28 ന് ഛഠ് പൂജയ്‌ക്ക് ശേഷം ബീഹാർ നിയമസഭാ തിരഞ്ഞെടുപ്പിനുള്ള പ്രചാരണം ആരംഭിക്കുമെന്നാണ് റിപ്പോർട്ടുകൾ.

വരാനിരിക്കുന്ന ബീഹാർ നിയമസഭാ തിരഞ്ഞെടുപ്പിനുള്ള മുഖ്യമന്ത്രി സ്ഥാനാർത്ഥിയായി ആർജെഡി നേതാവ് തേജസ്വി യാദവിനെ മഹാസഖ്യം വ്യാഴാഴ്ച പ്രഖ്യാപിച്ചിരുന്നു.