തിരുവനന്തപുരം: ശബരിമലയില് സ്വര്ണക്കൊള്ള നടത്തിയ പിണറായി സര്ക്കാരിനെതിരെ ബിജെപിയുടെ രാപകല് സമരം നാളെ തുടങ്ങും സെക്രട്ടേറിയറ്റ് ഉപരോധവും വെളളി ,ശനി ദിവസങ്ങളിലായി നടക്കും. ഒക്ടോബര് 24-25 തീയതികളില് നടക്കുന്ന പ്രതിഷേധം ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് ഉദ്ഘാടനം ചെയ്യും. 24ന് വൈകിട്ട് ആരംഭിക്കുന്ന ഉപരോധം 25ന് വൈകിട്ട് സമാപിക്കും. മുതിര്ന്ന സംസ്ഥാന നേതാക്കള് ഉപരോധ സമരത്തില് ഭാഗമാകും.
സ്വര്ണമോഷണത്തില് കൃത്യമായ നടപടി ആവശ്യപ്പെട്ടാണ് പ്രതിഷേധം. അന്വേഷണം ഉന്നതരിലേക്ക് എത്താതെ ജീവനക്കാരെ മാത്രം പ്രതിയാക്കി രക്ഷപ്പെടാന് ആരെയും അനുവദിക്കില്ല. മുന് ദേവസ്വം ബോര്ഡ് പ്രസിഡന്റിന്റെയും ഇപ്പോഴത്തെ ദേവസ്വം ബോര്ഡ് പ്രസിഡന്റിന്റെയും പങ്ക് കോടതി തന്നെ വ്യക്തമാക്കിയ സാഹചര്യത്തില് അവരെ സംരക്ഷിക്കാനുള്ള സര്ക്കാര് നടപടി അംഗീകരിക്കാന് കഴിയില്ല. ശബരിമലയില് മാത്രമല്ല, കേരളത്തിലെ ദേവസ്വം ബോര്ഡുകള് ഭരിക്കുന്ന എല്ലാ ക്ഷേത്രങ്ങളിലും നടന്നത് വന്മോഷണമാണെന്ന വിവരങ്ങളാണ് പുറത്തുവരുന്നത്.
സ്വര്ണക്കൊള്ള നടത്തിയ ദേവസ്വം മന്ത്രി രാജിവെക്കുക.ദേവസ്വം ബോര്ഡ് പിരിച്ചുവിടുക.
ദേവസ്വം ബോര്ഡിലെ കഴിഞ്ഞ 30 വര്ഷത്തെ സാമ്പത്തിക ഇടപാടുകള് കേന്ദ്ര ഏജന്സികളിലൂടെ അന്വേഷിപ്പിക്കുക.സംസ്ഥാനത്തെ എല്ലാ ദേവസ്വം ബോര്ഡുകളിലും അടിയന്തര സി എ ജി ഓഡിറ്റ് നടത്തുക എന്നീ ആവശ്യങ്ങളാണ് ബിജെപി മുന്നോട്ടുവെക്കുന്നതെന്ന് സംസ്ഥാന ജനറല് സെക്രട്ടറി അഡ്വ എസ് സുരേഷ് അറിയിച്ചു.
വെളളിയാഴ്ച രാത്രിയും മറ്റന്നാളുമായി നടക്കുന്ന പ്രതിഷേധ പരിപാടികളില് വിവിധ ജില്ലകളില് നിന്ന് 25,000ത്തോളം പ്രവര്ത്തകര് എത്തിച്ചേരും. സെക്രട്ടേറിയറ്റിന്റെ മൂന്ന് പ്രവേശന കവാടങ്ങളും ബിജെപി പ്രവര്ത്തകര് ഉപരോധിക്കും.
