മീൻ വൃത്തിയാക്കുന്നതിലെ ഏറ്റവും വലിയ കടമ്പയാണ് മീൻ ചെതുമ്പൽ കളയുക എന്നത്. പ്രത്യേകിച്ചും ഫ്ലാറ്റുകളിൽ താമസിക്കുന്നവർ വളരെയധികം ബുദ്ധിമുട്ടുന്ന ഒരു കാര്യമാണ് മീൻ വൃത്തിയാക്കൽ. മീൻ കഴിക്കണമെന്ന് ആഗ്രഹം തോന്നിയാലും അത് വൃത്തിയാക്കുന്ന ബുദ്ധിമുട്ട് ഓർക്കുമ്പോൾ നമ്മുടെ മനസ് പിന്നോട്ട് വലിയും.
ഇനി മുതൽ വളരെ എളുപ്പത്തിൽ എങ്ങും ആകാതെ തന്നെ നമുക്ക് മീൻ ചെതുമ്പൽ വൃത്തിയാക്കാം. കത്തി ഉപയോഗിക്കാതെ തന്നെ ക്ലീനിങ് ചെയ്യാം. കൈയും ഡ്രസ്സും കിച്ചൻ സിങ്കും ഒന്നും വൃത്തികേടാകില്ല. മീൻ മണം ചുറ്റുപാടും ഉണ്ടാകുമെന്നുള്ള ടെൻഷനും വേണ്ട. അതിനായി പ്ലാസ്റ്റിക് കുപ്പി മാത്രം മതിയാകും.
ഒരു പ്ലാസ്റ്റിക് കുപ്പി മാത്രം ഉപയോഗിച്ച് എങ്ങനെ മീൻ വൃത്തിയാക്കാം എന്നായിരിക്കും നിങ്ങളെല്ലാവരും ചിന്തിക്കുന്നത്. അതെ, ഒരു സാധാരണ പ്ലാസ്റ്റിക് കുപ്പി മാത്രം ഉപയോഗിച്ചും നമുക്ക് മീൻ വൃത്തിയാക്കാം പ്രധാനമായും മീൻ ചെതുമ്പൽ നമ്മുടെ ശരീരത്തും ചുറ്റുപാടും ഒന്നും വീഴാതെ തന്നെ കത്തിയുടെ സഹായമില്ലാതെ മീൻ ഏറ്റവും വൃത്തിയായി തന്നെ നമുക്ക് ക്ലീൻ ചെയ്തെടുക്കാൻ സാധിക്കും
അതിനായി ഒരു പ്ലാസ്റ്റിക് കുപ്പി എടുക്കുക. അതിന്റെ നടുഭാഗം വച്ച് കത്തി ഉപയോഗിച്ച് രണ്ടായിട്ട് മുറിച്ചെടുക്കുക. കത്തി ചൂടാക്കി പ്ലാസ്റ്റിക് കുപ്പി മുറിക്കുകയാണെങ്കിൽ കൂടുതൽ എളുപ്പത്തിൽ കുപ്പി മുറിഞ്ഞു കിട്ടും. അതിനുശേഷം നമുക്ക് വൃത്തിയാക്കേണ്ട മീൻ ഏതാണെങ്കിലും ഉദാഹരണത്തിന് മത്തിയാണ് നമ്മൾ വൃത്തിയാക്കാൻ എടുത്തിരിക്കുന്നതെങ്കിൽ മുറിച്ച കുപ്പിയുടെ അടിവശം എടുത്ത് ചരിച്ചു പിടിച്ച് മീൻ ചുരണ്ടുക. അപ്പോൾ മീനിന്റെ ചെതുമ്പൽ പൂർണമായും കുപ്പിക്ക് അകത്തേക്ക് വീഴും. ചെതുമ്പലിന്റെ ഒരംശം പോലും ചുറ്റുപാടും ആകില്ല. പൂർണമായും മീൻ വൃത്തിയാക്കാനും സാധിക്കും.
ഇങ്ങനെ ചെതുമ്പൽ കളഞ്ഞ ശേഷം മതിയുടെ തല കൈകൊണ്ടു അടർത്തിയെടുക്കാവുന്നതുമാണ്. മത്തിയുടെ തല നുള്ളിയെടുക്കുമ്പോൾ അതിനോട് ചേർത്ത് മത്തിക്കുള്ളിലുള്ള കുടലും അഴുക്കും വലിച്ചു നീക്കം ചെയ്യാം. അതിനു ശേഷം വെള്ളത്തിൽ ഉലച്ചു കഴുകിയാൽ മത്തി പൂർണമായും വൃത്തിയായി കിട്ടും.
