ന്യൂദല്ഹി : പയര്വര്ഗങ്ങളിലെ സ്വയംപര്യാപ്തത ദൗത്യം’, ‘പ്രധാനമന്ത്രി ധന്-ധാന്യ കൃഷി യോജന’ എന്നിവ സംബന്ധിച്ച് കേന്ദ്ര കൃഷി, കര്ഷകക്ഷേമ മന്ത്രി ശിവരാജ് സിംഗ് ചൗഹാന് മന്ത്രാലയത്തിലെ മുതിര്ന്ന ഉദ്യോഗസ്ഥരുമായി ഉന്നതതല യോഗം നടത്തി. യോഗത്തില്, ഇവ സമയബന്ധിതമായി നടപ്പിലാക്കുന്നതിനുള്ള നിര്ദ്ദേശങ്ങള് കേന്ദ്ര മന്ത്രി നല്കി. ‘പ്രധാനമന്ത്രി ധന്-ധാന്യ കൃഷി യോജന’യുടെ സത്വര നിര്വഹണം ഉറപ്പാക്കാന് ചൗഹാന് 11 മന്ത്രാലയങ്ങളിലെ മന്ത്രിമാരുമായുള്ള ഒരു യോഗം ഉടന് തന്നെ വിളിക്കും.
ജില്ലാതല ക്ലസ്റ്ററുകള് സൃഷ്ടിച്ചുകൊണ്ട് ‘പയര്വര്ഗങ്ങളില് സ്വയംപര്യാപ്തത ദൗത്യം’ നടപ്പിലാക്കുമെന്നും ഈ ക്ലസ്റ്ററുകള് രൂപീകരിക്കുന്നതിന് സംസ്ഥാനങ്ങളുടെ പിന്തുണ തേടുമെന്നും യോഗത്തില് അറിയിച്ചു. ‘പ്രധാനമന്ത്രി ധന്-ധാന്യ കൃഷി യോജന’ താഴെത്തട്ടില് ഫലപ്രദമായി നടപ്പിലാക്കുന്നത് ഉറപ്പാക്കാന് ചൗഹാന് ഉദ്യോഗസ്ഥര്ക്ക് നിര്ദ്ദേശം നല്കി. രണ്ട് സംരംഭങ്ങളും അടിസ്ഥാനതലത്തില് സമയബന്ധിതമായി നടപ്പിലാക്കുന്നത് കര്ഷകര്ക്ക് നേരിട്ട് ഗുണകരമാകുമെന്ന് അദ്ദേഹം പറഞ്ഞു. ‘പയര്വര്ഗങ്ങളിലെ സ്വയംപര്യാപ്തത ദൗത്യം’ വിജയകരവും സമയബന്ധിതവുമായി നടപ്പിലാക്കുന്നതിനായി ബന്ധപ്പെട്ട സംസ്ഥാനങ്ങളിലെ നോഡല് ഓഫീസര്മാരെ ഉള്പ്പെടുത്തി ഒരു യോഗം വിളിക്കാനും കേന്ദ്ര കൃഷി മന്ത്രി ഉദ്യോഗസ്ഥര്ക്ക് നിര്ദ്ദേശം നല്കി.
പ്രധാനമന്ത്രി നരേന്ദ്ര മോദി ആരംഭിച്ച ‘പ്രധാനമന്ത്രി ധന്-ധാന്യ കൃഷി യോജന’, 11 മന്ത്രാലയങ്ങളിലെ 36 ഉപ പദ്ധതികള് സംയോജിപ്പിച്ച്കൊണ്ട് രാജ്യത്തുടനീളമുള്ള വികസനം കാംക്ഷിക്കുന്ന100 ജില്ലകളിലെ കാര്ഷിക പുരോഗതി പ്രോത്സാഹിപ്പിക്കുക എന്നതാണ് ലക്ഷ്യമിടുന്നത്. ഈ പശ്ചാത്തലത്തിലാണ് പദ്ധതിയുടെ പരമാവധി നേട്ടങ്ങള് കര്ഷകരിലേക്ക് എത്തുന്നുണ്ടെന്ന് ഉറപ്പാക്കാന് ഈ 11 മന്ത്രാലയങ്ങളിലെ മന്ത്രിമാര്, സെക്രട്ടറിമാര്, നിതി ആയോഗിലെ ഉദ്യോഗസ്ഥര് എന്നിവരെ ഉള്പ്പെടുത്തി യോഗം സംഘടിപ്പിക്കാന് ചൗഹാന് ഉദ്യോഗസ്ഥരോട് നിര്ദ്ദേശിച്ചത്.
