കറികളിലെ പ്രധാനിയാണ് കറിവേപ്പില. കറികള്ക്ക് രുചിയും മണവും നൽകാൻ മാത്രമല്ല, ആരോഗ്യത്തിനും ഏറെ ഗുണം ചെയ്യും. കറികളിൽ നിന്നും കറിവേപ്പില ഇനി വലിച്ചെറിയരുത്,കറിവേപ്പില ആരോഗ്യത്തിന് ഉത്തമമാണ്. രക്തത്തിലെ പഞ്ചസാരയുടെയും കൊളസ്ട്രോളിന്റെയും അളവ് നിയന്ത്രിക്കുക, ദഹനം മെച്ചപ്പെടുത്തുക, പ്രതിരോധശേഷി വർദ്ധിപ്പിക്കുക, ചർമ്മത്തിന്റെയും മുടിയുടെയും ആരോഗ്യം മെച്ചപ്പെടുത്തുക തുടങ്ങിയ നിരവധി ഗുണങ്ങൾ ഇവ നൽകുന്നു.
ഫ്രീ റാഡിക്കലുകളെയും വിട്ടുമാറാത്ത രോഗങ്ങളെയും ചെറുക്കാൻ സഹായിക്കുന്ന ആൻ്റിഓക്സിഡൻ്റുകളും കറിവേപ്പിലയിൽ ധാരാളമായി അടങ്ങിയിട്ടുണ്ട്. വിറ്റാമിൻ എ, വിറ്റാമിൻ ബി, വിറ്റാമിൻ സി, കാൽസ്യം, ഇരുമ്പ്, ആന്റി ഓക്സിഡന്റുകൾ തുടങ്ങിയ അവശ്യ പോഷകങ്ങളാൽ സമ്പുഷ്ടമാണ് കറിവേപ്പില. ഇത് കണ്ണുകളുടെ ആരോഗ്യം നിലനിര്ത്താന് സഹായിക്കുന്നു.
വെറുംവയറ്റില് കഴിക്കാം
വെറുംവയറ്റില് കറിവേപ്പില ചവയ്ക്കുന്നത്, വയറു വീർക്കൽ, ഗ്യാസ് അല്ലെങ്കിൽ മലബന്ധം പോലുള്ള പ്രശ്നങ്ങൾ കുറയ്ക്കുകയും, ദഹനം കൂട്ടാന് സഹായിക്കുകയും ചെയ്യും. ഇതിലുള്ള നാരുകളും ആൽക്കലോയിഡുകളും ശരീരത്തെ ശുദ്ധീകരിക്കാനും വിഷവസ്തുക്കളെ പുറന്തള്ളാനും സഹായിക്കും. അവ കൊഴുപ്പ് അടിഞ്ഞുകൂടുന്നത് കുറയ്ക്കുകയും കാലക്രമേണ ഉപാപചയ പ്രവര്ത്തനങ്ങള് മെച്ചപ്പെടുത്തുകയും ചെയ്യും.
ഭക്ഷണ ചേരുവയായി ഉപയോഗിക്കാം:സ്വാദ് വർദ്ധിപ്പിക്കാനും ആരോഗ്യപരമായ ഗുണങ്ങൾ നേടാനും ഇവ കറികളിലും മറ്റ് വിഭവങ്ങളിലും ഉൾപ്പെടുത്തുക.
കറിവേപ്പില വെള്ളം: ദഹനം മെച്ചപ്പെടുത്താനും മറ്റ് ഗുണങ്ങൾ നൽകാനും, കറിവേപ്പില ഇലകൾ വെള്ളത്തിൽ തിളപ്പിച്ച്, അരിച്ചെടുത്ത് വെള്ളം കുടിക്കുക.
ജൂസ്: നാരങ്ങയും പഞ്ചസാരയും ചേർത്ത കറിവേപ്പില ജൂസ് ഗർഭകാല ഛർദ്ദിയും ഓക്കാനവും കുറയ്ക്കാൻ സഹായിക്കും
