പാലക്കാട്: കണ്ണാടി എച്ച്എസ്എസിലെ ഒന്പതാം ക്ലാസ് വിദ്യാര്ത്ഥി അര്ജുന് ആത്മഹത്യ ചെയ്ത സംഭവത്തില് വിശദമായ അന്വേഷണം നടത്തി റിപ്പോര്ട്ട് സമര്പ്പിക്കാന് വിദ്യാഭ്യാസ മന്ത്രി വി ശിവന്കുട്ടി പൊതുവിദ്യാഭ്യാസ ഡയറക്ടര്ക്ക് നിര്ദേശം നല്കി. ഇന്സ്റ്റാഗ്രാമില് സഹപാഠികള് തമ്മില് മെസേജ് അയച്ചതിന് ക്ളാസ് ടീച്ചര് അര്ജുനെ ഭീഷണിപ്പെടുത്തിയിരുന്നെന്നാണ് കുടുംബം ആരോപിക്കുന്നത്. ടീച്ചര് നിരന്തരം മാനസികമായി പീഡിപ്പിക്കാറുണ്ടെന്നും ക്ളാസില് വച്ച് സൈബര് സെല്ലില് വിളിക്കുകയും അര്ജുനെ ജയിലിലിടുമെന്ന് ടീച്ചര് ഭീഷണിപ്പെടുത്തിയെന്നും കുട്ടികളും ആരോപിക്കുന്നു. സ്കൂളില് നിന്നും വീട്ടില് നിന്നും അര്ജുന് പ്രഷര് നേരിട്ടിരുന്നുവെന്ന് മറ്റു ചില കുട്ടികളും മാധ്യമപ്രവര്ത്തകരോടു പറഞ്ഞു. പ്രതിഷേധം ശക്തമായതോടെ സംഭവത്തില് സ്കൂള് പ്രിന്സിപ്പലിനെയും ആരോപണ വിധേയയായ അധ്യാപികയെയും മാനേജ്മെന്റ് അന്വേഷണവിധേയമായി സസ്പെന്ഡു ചെയ്തിരുന്നു.
