തിരുവനന്തപുരം: മകന് വിവേക് കിരണിനെതിരായ ഇ ഡി നോട്ടീസ് സംബന്ധിച്ച് സിപിഎം ജനറല് സെക്രട്ടറി എം എ ബേബി നടത്തിയ പ്രതികരണം വസ്തുതകള് മനസിലാകാതെയെന്ന് മുഖ്യമന്ത്രി പിണറായി വിജയന്.അദ്ദേഹം വാര്ത്തകള് കണ്ട് പ്രതികരിച്ചതായിരിക്കും.
ചെന്നൈയില് പാര്ട്ടി പരിപാടിക്കെത്തിയ എം എ ബേബി,മുഖ്യമന്ത്രിയുടെ മകന് എതിരായ ഇ ഡി നോട്ടീസ് ഒരു അടിസ്ഥാനവുമില്ലാത്തതെന്നാണ് പ്രതികരിച്ചത്. ഇ ഡി നോട്ടീസ് അയച്ച് ഭയപ്പെടുത്താന് നോക്കി.വസ്തുതകള് ഇല്ലാത്ത നോട്ടീസാണിതെന്നും നോട്ടീസ് അയച്ചിട്ട് അതില് അവര്ക്കുതന്നെ പിന്നീട് കഴമ്പില്ലെന്ന് കണ്ട് പിന്വലിക്കേണ്ടിവന്നതാണെന്നുമാണ് ബേബി പറഞ്ഞത്.
അതിനിടെ, ലൈഫ് മിഷന് ഫ്ലാറ്റ് തട്ടിപ്പുമായി ബന്ധപ്പെട്ട കേസില് മകന് സമന്സ് ലഭിച്ചിട്ടില്ലെന്ന് വാര്ത്താസമ്മേളനത്തില് മുഖ്യമന്ത്രി ആവര്ത്തിച്ചു.മകന് അത്തരം സമന്സ് കൈപ്പറ്റിയതായി തന്നോട് പറഞ്ഞിട്ടില്ല. ഇതെല്ലാം വിരല് ചൂണ്ടുന്നത് തന്റെ സുതാര്യവും കളങ്ക രഹിതവുമായ പൊതുജീവിതത്തെ കരിവാരി തേക്കുന്നതിലാണ്.പത്ത് വര്ഷത്തെ ഭരണത്തില് ഉന്നത തലങ്ങളിലെ അഴിമതി പൂര്ണമായും അവസാനിപ്പിച്ചു. രാഷ്ട്രീയ താല്പര്യങ്ങള്ക്ക് വേണ്ടി ഏജന്സികളെ കൊണ്ടുവന്ന് മറ്റൊരു രീതിയില് ചിത്രീകരിക്കാന് ശ്രമിച്ചാല് വിലപ്പോകില്ല.
തന്റെ മകനെ നിങ്ങള് എത്ര പേര് കണ്ടു എന്ന് അറിയില്ല. എവിടെയെങ്കിലും നിങ്ങള് അവനെ കണ്ടോ? ക്ലിഫ് ഹൗസില് എത്ര മുറി ഉണ്ടെന്ന് പോലും അവന് അറിയുമോ എന്ന് സംശയമുണ്ട്. മകന് ഒരു അധികാര ഇടനാഴിയിലും വരുന്നയാളല്ല. മകന് മര്യാദയ്ക്കുള്ള ജോലി ചെയ്താണ് പ്രവര്ത്തിക്കുന്നത്. മകനെ ഉള്പ്പെടുത്താന് ശ്രമിച്ചാല് അതുകൊണ്ട് വിവാദം ഉണ്ടാകുമോ? അതുകൊണ്ടൊക്കെ ഞാന് പേടിക്കുമോയെന്നും മുഖ്യമന്ത്രി പറഞ്ഞു.
