മമതയുടെ ബംഗാൾ ‘ബലാൽസംഗങ്ങളുടെ പറുദീസ’ ആകുന്നു: പ്രതികൾക്ക് ‘സുരക്ഷിത സ്വർഗം’

കൊൽക്കത്ത:ബംഗാളിലെ ദുർഗാപുരിൽ സ്വകാര്യ മെഡിക്കൽ കോളജിലെ രണ്ടാം വർഷ എംബിബിഎസ് വിദ്യാർത്ഥിനിയെ കൂട്ടബലാൽസംഗം ചെയ്ത സംഭവം സംസ്ഥാനത്തെ മുഴുവൻ നടുക്കിയിരിക്കുകയാണ്. ക്യാംപസിന് സമീപം വെള്ളിയാഴ്ച രാത്രിയാണ് ഒഡീഷ സ്വദേശിയായ വിദ്യാർത്ഥിനിയെ മൂന്ന് പേർ ചേർന്ന് ബലാൽസംഗം ചെയ്തത്.

സുഹൃത്തിനൊപ്പം ഭക്ഷണം കഴിച്ച് ഹോസ്റ്റലിലേക്ക് മടങ്ങുന്നതിനിടെയാണ് സംഭവം. രാത്രി 10 മണിയോടെ സുഹൃത്ത് മടങ്ങിയതിനു പിന്നാലെ പ്രതികൾ അവളെ കാടുപിടിച്ച പ്രദേശത്തേക്ക് ഭീഷണിപ്പെടുത്തി കൊണ്ടുപോയി പീഡിപ്പിച്ചെന്നാണ് പരാതിയിൽ പറയുന്നത്. വിദ്യാർത്ഥിനിയുടെ മൊബൈൽ ഫോണും പണവും കവർന്ന പ്രതികൾ പീഡന ദൃശ്യങ്ങളും പകർത്തിയതായും പൊലീസ് അന്വേഷണം വ്യക്തമാക്കുന്നു.

സംഭവത്തിന് പിന്നാലെ സംസ്ഥാനത്ത് വ്യാപകമായ പ്രതിഷേധമാണ് ഉയർന്നിരിക്കുന്നത്. സ്ത്രീകൾക്ക് സുരക്ഷിതമായ അന്തരീക്ഷം ഒരുക്കുന്നതിൽ മമതാ ബാനർജി സർക്കാർ പരാജയപ്പെട്ടുവെന്നാരോപിച്ച് പ്രതിപക്ഷം മുന്നേറ്റം തുടങ്ങി. ദുർഗാപുര്‍ സംഭവം മമതയുടെ ഭരണകാലത്ത് തുടർച്ചയായി നടന്നുവരുന്ന സ്ത്രീകളെതിരായ അതിക്രമങ്ങളുടെ നീണ്ട നിരയിലെ മറ്റൊരു ദാരുണഘട്ടമായാണ് വിലയിരുത്തപ്പെടുന്നത്.

മമതയുടെ ഭരണകാലം: ബംഗാളിൽ ആവർത്തിച്ച കൂട്ടബലാൽസംഗങ്ങളുടെ നീണ്ട പട്ടിക
മമതാ ബാനർജിയുടെ ഭരണകാലത്ത് സ്ത്രീകൾക്കെതിരായ അതിക്രമങ്ങളും കൂട്ടബലാൽസംഗങ്ങളും ആവർത്തിച്ച് നടന്നുവരികയാണ്. ദേശീയ തലത്തിലും അന്താരാഷ്‌ട്ര തലത്തിലും ആകമാനം ശ്രദ്ധ നേടിയ നിരവധി സംഭവങ്ങൾ ബംഗാളിന്റെ നിയമ-സമാധാന സംവിധാനത്തിലെ ഗുരുതര വീഴ്ചകളെ തുറന്നുകാട്ടുന്നു.

പാർക്ക് സ്ട്രീറ്റ് കൂട്ടബലാൽസംഗം (2012)
മമതയുടെ ആദ്യ ഭരണകാലത്ത് കൊൽക്കത്തയിലെ പാർക്ക് സ്ട്രീറ്റ് പ്രദേശത്ത് യുവതിയെ കൂട്ടബലാൽസംഗം ചെയ്ത സംഭവം രാജ്യത്തെ നടുക്കിയിരുന്നു. സംഭവം “നാടകം” മാത്രമാണെന്ന് മമത പറഞ്ഞ പ്രസ്താവന വൻ രാഷ്‌ട്രീയ വിവാദത്തിനും ജനരോഷത്തിനും വഴിവെച്ചു. പൊലീസ് അന്വേഷണം പ്രാരംഭത്തിൽ മന്ദഗതിയിലായതും സർക്കാരിന്റെ നിലപാട് വിമർശനത്തിന് വിധേയമായി.
ബിര്ഭൂം കൂട്ടബലാൽസംഗം (2014)
ഗ്രാമസഭയുടെ അനുമതിയോടെ 20 വയസ്സുള്ള യുവതിയെ 12 പേർ ചേർന്ന് കൂട്ടബലാൽസംഗം ചെയ്ത സംഭവം അന്താരാഷ്‌ട്ര മാധ്യമങ്ങൾക്കുപോലും പ്രധാന വാർത്തയായി. സുപ്രീംകോടതിയുടെ ഇടപെടലിനെ തുടർന്നാണ് അന്വേഷണം മുന്നേറിയത്.
നദിയ ജില്ല കൂട്ടബലാൽസംഗം (2023)
ഒരു പ്രാദേശിക രാഷ്‌ട്രീയപ്രവർത്തകനും കൂട്ടരും ചേർന്ന് 14 വയസ്സുള്ള പെൺകുട്ടിയെ പീഡിപ്പിച്ച സംഭവം വ്യാപക പ്രതിഷേധത്തിന് വഴിവെച്ചു. പ്രതികളെ സംരക്ഷിക്കാൻ ഭരണകൂടം ശ്രമിച്ചുവെന്നാരോപണം ശക്തമായി ഉയർന്നു.
ആർജി കർ മെഡിക്കൽ കോളജ് കൂട്ടബലാൽസംഗവും കൊലപാതകവും (2024)
കൊൽക്കത്തയിലെ മെഡിക്കൽ കോളജിൽ പിജി ഡോക്ടറെ കൂട്ടബലാൽസംഗം ചെയ്ത് കൊലപ്പെടുത്തിയ സംഭവം സംസ്ഥാനത്തെ നടുക്കിയിരുന്നു. വിദ്യാർത്ഥികളുടെയും ഡോക്ടർമാരുടെയും വ്യാപകമായ സമരങ്ങൾക്കും ദേശീയ മാധ്യമങ്ങളിലെ വിമർശനങ്ങൾക്കും ഇടയാക്കിയ സംഭവം ആയിരുന്നു ഇത്.

ഇത്തരം സംഭവങ്ങൾ ആവർത്തിച്ച് നടക്കുന്നത് സംസ്ഥാനത്തിന്റെ നിയമ-സമാധാന സംവിധാനത്തിലെ പാളിച്ചകളാണ് പ്രധാന കാരണമെന്നതാണ് പ്രതിപക്ഷവും സാമൂഹിക സംഘടനകളും ഉന്നയിക്കുന്ന പ്രധാന വിമർശനം. സ്ത്രീകൾക്ക് സംരക്ഷണം ഉറപ്പാക്കുന്ന നിയമങ്ങൾ ഉണ്ടായിട്ടും, രാഷ്‌ട്രീയ ഇടപെടലുകൾ, പൊലീസ് മന്ദഗതിയിലുള്ള അന്വേഷണങ്ങൾ, പ്രതികളെ സംരക്ഷിക്കുന്ന നിലപാടുകൾ തുടങ്ങിയവയാണ് കുറ്റവാളികൾക്ക് ‘സുരക്ഷിത സ്വർഗം’ ഒരുക്കുന്നതെന്ന് ആരോപിക്കുന്നു.

വിദ്യാഭ്യാസ സ്ഥാപനങ്ങളുടെയും പൊതു സ്ഥലങ്ങളുടെയും പരിസരത്ത് സ്ത്രീകൾക്കെതിരായ പീഡനങ്ങൾ വർധിച്ചുവരികയാണെന്ന് കണക്ക് വ്യക്തമാക്കുന്നു. ക്യാംപസുകളിൽ ആവശ്യമായ സുരക്ഷാ സംവിധാനങ്ങൾ ഇല്ലായ്‌മയും പട്രോളിംഗ് അഭാവവും പ്രതികൾക്ക് അനുകൂല സാഹചര്യം സൃഷ്ടിക്കുന്നു.