കോട്ടയം: കൈപൊള്ളുമെന്നായപ്പോള് വീരവാദങ്ങള് അവസാനിപ്പിച്ച് അരമനകളിലേക്കെത്തി വിദ്യാഭ്യാസ മന്ത്രി വി.ശിവന്കുട്ടി. എയ്ഡഡ് വിദ്യാഭ്യാസ സ്ഥാപനങ്ങളിലെ അധ്യാപകനിയമനവുമായി ബന്ധപ്പെട്ട് ഇടഞ്ഞു നില്ക്കുന്ന ക്രൈസ്ത വിഭാഗങ്ങളെ അനുനയിപ്പിക്കുന്നതിന്റെ ഭാഗമായി ചങ്ങനാശ്ശേരി അതിരൂപതാ ആസ്ഥാനത്തെത്തി ബിഷപ്പ് മാര് തോമസ് തറയിലുമായി ശിവന്കുട്ടി സംസാരിച്ചു. നിയമനങ്ങള് നടന്ന അധ്യാപകര്ക്ക് നിയമനാംഗീകാരം നല്കി ശമ്പളം ലഭ്യമാക്കുന്ന കാര്യത്തില് അനുകൂല നിലപാടെടുക്കാമെന്ന് മന്ത്രി ബിഷപ്പിന് ഉറപ്പു നല്കിയതായാണ് അറിയുന്നത്. കേരള കോണ്ഗ്രസ് എം ചെയര്മാന് ജോസ് കെ. മാണിയെയും കൂട്ടിയാണ് ശിവന്കുട്ടി അരമനയിലെത്തിയത്.
ഇക്കാര്യത്തില് ക്രൈസ്തവ സഭകളും സര്ക്കാരും തമ്മില് കൂടുതല് ചര്ച്ചകള് ആവശ്യമാണെങ്കില് കേരള കോണ്ഗ്രസ് എം അതിന് മുന്കൈയെടുക്കുമെന്ന് ജോസ് കെ. മാണി പറഞ്ഞു. എംഎല്എ ജോബ് മൈക്കിള് അതിരൂപതാ വികാരി ജനറാള് ആന്റണി ഏത്തക്കാട്ട്, കോര്പ്പറേറ്റ് മാനേജര് ജോബി മൂലയില് തുടങ്ങിയവരും ചര്ച്ചയില് പങ്കെടുത്തു.
