കോട്ടയം : ബാങ്ക് അധികൃതരും പൊലീസും ചേര്ന്ന് ‘മുംബൈ പൊലീസിന്റെ’ വെര്ച്വല് അറസ്റ്റ് പൊളിച്ചു. മുതിര്ന്ന നിക്ഷേപകനില് നിന്ന് 15 ലക്ഷം രൂപ തട്ടിയെടുക്കാനുള്ള ശ്രമമാണ് ബാങ്ക് അധികൃതരുടെ സന്ദര്ഭോചിതമായ ഇടപെടലില് പരാജയപ്പെടുത്തിയത്.15 ലക്ഷം രൂപയുടെ ഫിക്സഡ് ഡെപ്പോസിറ്റ് ഉടന് പിന്വലിക്കണമെന്നാവശ്യപ്പെട്ട് ചങ്ങനാശേരി കുരിശുംമൂട്ടിലെ സൗത്ത് ഇന്ത്യന് ബാങ്ക് ശാഖയില് ഓടിപ്പാഞ്ഞെത്തിയ വൃദ്ധന്റെ വെപ്രാളംകണ്ട് ജീവനക്കാര്ക്ക് സംശയം തോന്നിയതാണ് രക്ഷയായത്. പണം അടിയന്തിരമായി പിന്വലിക്കേണ്ട സാഹചര്യം ചോദിച്ചറിയാന് ശ്രമിച്ച അസി. മാനേജര് വിഷ്ണു ഗോപാലിനോടും ബ്രാഞ്ച് മാനേജര് മിന്റു ജോസിനോടും സാമ്പത്തികത്തട്ടിപ്പു കേസുണ്ടെന്നും അറസ്റ്റ് ഒഴിവാക്കാന് 15 ലക്ഷം രൂപ മുംബൈ പൊലീസ് ആവശ്യപ്പെട്ടെന്നും നിക്ഷേപകന് തുറന്നു പറയുകയായിരുന്നു. ഇക്കാര്യം ബാങ്ക് അധികൃതര് പൊലീസില് അറിയിച്ചു. പൊലീസ് ഉടന് ബാങ്കിലെത്തി നികഷേപകനെ സ്റ്റേഷനിലേക്കു കൂട്ടിക്കൊണ്ടുപോവുകയായിരുന്നു. തട്ടിപ്പുകാര് വീണ്ടും വിളിച്ചപ്പോള് പൊലീസാണ് ഫോണെടുത്തത്. ഇതോടെ തട്ടിപ്പുകാര് പിന്വാങ്ങി.
