കോഴിക്കോട് : താമരശേരി താലൂക്ക് ആശുപത്രിയില് ഡ്യൂട്ടിയില് ഉണ്ടായിരുന്ന ഡോക്ടറെ തലയ്ക്ക് വെട്ടി ഗുരുതരമായി പരിക്കേല്പ്പിച്ച സംഭവത്തില് പ്രതിഷേധിക്കാന് കെ ജി എം ഒ എ വ്യാഴാഴ്ച സംസ്ഥാന വ്യാപകമായി പ്രതിഷേധ ദിനം ആചരിക്കും. കോഴിക്കോട് ജില്ലയിലെ ആശുപത്രികളില് അടിയന്തര സേവന വിഭാഗം മാത്രമേ പ്രവര്ച്ചിക്കൂ.
കേരളത്തിലെ സര്ക്കാര് ആശുപത്രികളിലെ അരക്ഷിതാവസ്ഥയും സുരക്ഷാ വീഴ്ചയും വ്യക്തമാക്കുന്ന സംഭവമാണുണ്ടായതെന്ന് ഡോക്ടര്മാരുടെ സംഘടന പറയുന്നു. ആരോഗ്യ പ്രവര്ത്തകര്ക്ക് സുരക്ഷിതമായ തൊഴിലിടങ്ങള് ഉറപ്പാക്കുന്നതില് സര്ക്കാരും സമൂഹവും പരാജയപ്പെടുന്നു എന്നത് തികച്ചും നിരാശാജനകമാണ്. തുടര്ച്ചയായി ഉണ്ടായിക്കൊണ്ടിരിക്കുന്ന ആശുപത്രി അക്രമങ്ങളുടെ പശ്ചാത്തലത്തില് ആശുപത്രികളെ അതിസുരക്ഷാ മേഖലകളായി പ്രഖ്യാപിക്കണമെന്ന് ദീര്ഘകാലമായി സംഘടന മുന്നോട്ടുവച്ചിട്ടുള്ള ആവശ്യം ഇതേവരെ യാഥാര്ത്ഥ്യമായിട്ടില്ല
ഡോക്ടര് വന്ദനാദാസിന്റെ ദാരുണമായ കൊലപാതകത്തിന് ശേഷം മുഖ്യമന്ത്രിയുടെ അധ്യക്ഷതയിലുളള ഉന്നതതല യോഗത്തില് ആശുപത്രികളിലെ സുരക്ഷ വര്ദ്ധിപ്പിക്കുന്നത് സംബന്ധിച്ച് കാതലായ നിര്ദ്ദേശങ്ങളും തീരുമാനങ്ങളും ഉണ്ടായിരുന്നു. ആശുപത്രികളുടെ സുരക്ഷാ ചുമതല സ്റ്റേറ്റ് ഇന്ഡസ്ട്രിയല് സെക്യൂരിറ്റി ഫോഴ്സിനെ ഏല്പ്പിക്കും എന്നും എല്ലാ പ്രധാന ആശുപത്രികളിലും പൊലീസ് ഔട്ട് പോസ്റ്റുകള് സ്ഥാപിക്കും തിരക്കുള്ള സമയത്ത് അത്യാഹിത വിഭാഗങ്ങളില് രണ്ട് ഡോക്ടര്മാരുടെ സേവനം ഉറപ്പുവരുത്തും എന്നുമുള്ള വാഗ്ദാനങ്ങള് ഇപ്പോഴും നടപ്പായിട്ടില്ല. ട്രയാജ് സംവിധാനം നടപ്പാക്കുന്നത് സംബന്ധിച്ച് 2021-ല് തന്നെ സര്ക്കാര് ഉത്തരവ് പുറത്തിറങ്ങിയെങ്കിലും ഭൂരിഭാഗം സര്ക്കാര് ആശുപത്രികളിലും മാനവവിഭവശേഷിക്കുറവ് മൂലം കാര്യക്ഷമമായ ട്രയാജ് സംവിധാനം നടപ്പിലായിട്ടില്ല.
ആശുപത്രികളിലെ സുരക്ഷ ഉറപ്പാക്കുന്നതിനായി കോഡ് ഗ്രേ പ്രോട്ടോകോള് നടപ്പിലാക്കിയിട്ടുണ്ടെങ്കിലും ഇതിന്റെ ഭാഗമായ നിര്ദ്ദേശങ്ങള് പലയിടത്തും യാഥാര്ത്ഥ്യമായിട്ടില്ല. ഇതിന്റെ ഭാഗമായി വിമുക്തഭടന്മാരെ സുരക്ഷാ ജീവനക്കാരായി നിയമിക്കുന്നതിനും ആശുപത്രികളില് സിസിടിവികള് സ്ഥാപിക്കുന്നതിനുള്ള ഫണ്ടുകള് വകയിരുത്തുന്നതില് തദ്ദേശ സ്വയംഭരണ സ്ഥാപനങ്ങളും പലയിടത്തും പരാജയപ്പെടുന്നു. അതോടൊപ്പം സര്ക്കാര് ആശുപത്രികളില് പ്രത്യേകിച്ച് അത്യാഹിത വിഭാഗങ്ങളില് ഉണ്ടാവുന്ന അനിയന്ത്രിതമായ തിരക്ക് പലപ്പോഴും ആശുപത്രി അക്രമങ്ങളിലേക്ക് വഴിതെളിക്കുന്നു.
ഈ സാഹചര്യങ്ങളില് സംസ്ഥാനത്തെ സര്ക്കാര് ആശുപത്രികളില് ജോലിചെയ്യുന്ന ആരോഗ്യ പ്രവര്ത്തകരുടെ സുരക്ഷ ഉറപ്പാക്കുന്നതിനായി അടിയന്തരമായ ഇടപെടല് സര്ക്കാരിന്റെ ഭാഗത്തുനിന്നും ഉണ്ടാവണം.സംസ്ഥാനത്തെ ആശുപത്രികള് അതിസുരക്ഷാ മേഖലകളായി പ്രഖ്യാപിക്കുകയും എല്ലാ പ്രധാന ആശുപത്രികളില് പൊലീസ് ഔട്ട് പോസ്റ്റുകള് അടിയന്തരമായി സ്ഥാപിക്കുകയും ആശുപത്രികളുടെ സുരക്ഷാജോലിക്കായി സായുധരായ വിമുക്തഭടന്മാരെ നിയമിക്കുകയും ചെയ്യുന്നതിനുള്ള നടപടികള് സ്വീകരിക്കണമെന്ന് സര്ക്കാരിനോട് സംഘടന ആവശ്യപ്പെടുന്നു.
ഇതിനൊപ്പം, അത്യാഹിത വിഭാഗങ്ങളില് ഒരേസമയം രണ്ട് ഡോക്ടര്മാരുടെ സേവനം ലഭ്യമാകുന്ന വിധത്തില് പ്രധാന ആശുപത്രികളില് ഏറ്റവും കുറഞ്ഞത് 8 ക്യാഷ്വാലിറ്റി മെഡിക്കല് ഓഫീസര്മാരുടെ തസ്തികകള് ഉടന്തന്നെ സൃഷ്ടിക്കണം. കോഡ് ഗ്രേ പ്രോട്ടോകോള് നിര്ദ്ദേശങ്ങള് പാലിക്കുന്നതിനായി ആവശ്യത്തിനുള്ള ഫണ്ടുകള് വകയിരുത്തുന്നതിന് തദ്ദേശസ്വയംഭരണ സ്ഥാപനങ്ങള്ക്കും നിര്ദ്ദേശം നല്കണമെന്നും കെ ജി എം ഒ എ ആവശ്യപ്പെട്ടു
