സിനിമാപ്രേമികൾ വളരെയധികം ആവേശത്തോടെ കാത്തിരിക്കുന്ന സിനിമയാണ് കാന്താര ചാപ്റ്റർ 1. ഋഷഭ് ഷെട്ടി സംവിധാനം ചെയ്തു നായകനായി എത്തിയ സിനിമ വലിയ ബജറ്റിൽ ആണ് ഒരുങ്ങിയത്. ഇപ്പോഴിതാ സിനിമ ഇന്ത്യയിൽ നിന്ന് മാത്രം 200 കോടി കടന്നിരിക്കുകയാണ്.
സാക്നിൽക്കിന്റെ റിപ്പോർട്ട് പ്രകാരം, മികച്ച ഓപ്പണിങ് ആണ് സിനിമയ്ക്ക് ലഭിച്ചിരിക്കുന്നത്. ആദ്യ ദിവസം ഇന്ത്യയിലെ വിവിധ ഭാഷകളിൽ നിന്ന് 61.85 കോടി രൂപ സിനിമ നേടിയെന്നാണ് കണക്കുകൾ. കന്നഡയിൽ നിന്ന് 19.6 കോടിയും, തെലുങ്കിൽ നിന്ന് 13 കോടിയും, ഹിന്ദിയിൽ നിന്ന് 18.5 കോടിയും, തമിഴിൽ നിന്ന് 5.5 കോടി, മലയാളത്തിൽ നിന്ന് 5.25 കോടി എന്നിങ്ങനെയാണ് കളക്ഷൻ റിപ്പോർട്ടുകൾ. ആദ്യ ദിവസം തന്നെ ആഗോളതലത്തിൽ ഏകദേശം 89 കോടി രൂപ നേടിയിട്ടുണ്ട് എന്നാണ് വിവരം.
ഇപ്പോഴിതാ തന്റെ വിശ്വാസങ്ങളെ പറ്റി ഋഷഭ് ഷെട്ടി മാധ്യമങ്ങളോട് പറഞ്ഞതാണ് വൈറലായിരിക്കുന്നത് . “സിനിമയ്ക്ക് പ്രശംസ ലഭിക്കുമ്പോഴും, നിങ്ങളുടെ സിനിമ കാലാകാലങ്ങളായി നിലനിൽക്കുന്ന അന്ധവിശ്വാസങ്ങളെയും അതുപോലുള്ള കാര്യങ്ങളെയും പ്രോത്സാഹിപ്പിക്കുന്നുവെന്ന് കരുതുന്ന ഒരു വിഭാഗമുണ്ട്. അതിനോട് നിങ്ങൾ എങ്ങനെയാണ് പ്രതികരിക്കുന്നത്?”, എന്നായിരുന്നു അവതാരകന്റെ ചോദ്യം .
അതിന് “നമ്മുടെ കാലാകാലങ്ങളായി നിലനിൽക്കുന്ന കെട്ടുകഥകൾ, അന്ധവിശ്വാസങ്ങൾ, മതപരമായ കഥകൾ എന്നിവയെക്കുറിച്ച് ധാരാളം പരാമർശങ്ങളുണ്ട്. അതിൽ വിശ്വസിക്കുന്നവർ അതിനെ പോസിറ്റീവായി എടുക്കും, അല്ലാത്തവർ അതിനെ നെഗറ്റീവായി കാണും “ എന്ന് ഋഷഭ് ഷെട്ടി മറുപടി നൽകി .
ഒപ്പം “പക്ഷപാതപരമായ വീക്ഷണകോണിലൂടെ ഒരു കഥ പറയാൻ ഞങ്ങൾ ശ്രമിക്കുന്നില്ല. ഒരു ജനപ്രിയ മതപരമായ നാടോടിക്കഥയെ അതേപടി ചിത്രീകരിക്കുക മാത്രമാണ് ഞങ്ങൾ ചെയ്യുന്നത്. ഞാൻ അതിൽ വിശ്വസിക്കുന്നു, എന്റെ കുടുംബവും അങ്ങനെ തന്നെ. മനുഷ്യരേക്കാൾ ശക്തമായ ഒരു ഊർജ്ജമുണ്ടെന്ന് ഞങ്ങൾ വിശ്വസിക്കുന്നു. മിക്ക ആളുകളും അതിൽ വിശ്വസിക്കുമെന്ന് ഞാൻ കരുതുന്നു. ദൈവം, ദേവസ്ഥാനം തുടങ്ങിയ കാര്യങ്ങൾ എന്റെ ജീവിതത്തിന്റെ അവിഭാജ്യ ഘടകമാണ്.നമുക്ക് മുകളിൽ എപ്പോഴും ഒരു ഊർജ്ജം നമ്മെ സംരക്ഷിക്കുന്നുണ്ടെന്ന് ഞാൻ വിശ്വസിക്കുന്നു.
വിശ്വാസമില്ലാത്തവരുടെ പോയിന്റ് ഓഫ് വ്യൂവിനെ ഞാൻ അംഗീകരിക്കുന്നു. അതേ പോലെ എന്റെ വിശ്വാസത്തെയും നിങ്ങൾ ബഹുമാനിക്കണമെന്നേ എനിക്ക് പറയാനുള്ളു . വിശ്വാസമില്ലായ്മയും ഒരു തരത്തിൽ പറഞ്ഞാൽ ഒരു വിശ്വാസമാണെന്നും ‘ അദ്ദേഹം പറഞ്ഞു.
