കണ്ണൂര്: അടിയന്തര സാഹചര്യങ്ങളില് യാത്രക്കാരുടെ തിരക്ക് നിയന്ത്രിക്കാന് സ്ലീപ്പര് കോച്ചുകളെ ഇനി സ്പെഷ്യല് ട്രെയിനുകളാക്കി ഉപയോഗപ്പെടുത്താം. മണിക്കൂറുകളോളം ഡിപ്പോകളില് നിര്ത്തിയിടുന്ന സ്ലീപ്പര് കോച്ച് വണ്ടികളെ സമയക്രമീകരണം നടത്തി ഹ്രസ്വദൂരയാത്രക്ക് സജ്ജമാക്കാനാണ് റെയില്വേ തീരുമാനം. ചെറുദൂരയാത്രക്ക് അണ് റിസര്വ്ഡ് സ്ലീപ്പര് കോച്ചുകളാക്കി മാറ്റി ഓടിക്കാനുള്ള അധികാരം അതത് സോണല് ജനറല് മാനേജര്മാര്ക്ക് റെയില്വേ നല്കി.
സ്പെഷ്യല് ട്രെയിനുകള് ഓടിക്കാന് അണ് റിസര്വ്ഡ് കോച്ചുകള് ഇല്ലാത്ത സാഹചര്യത്തില് സ്ലീപ്പര് കോച്ചുകള് ഉപയോഗിക്കാനാണ് നിര്ദേശം. അപ്രതീക്ഷിത ഗതാഗതത്തിരക്കുള്ള സമയങ്ങളില് ഈ സൗകര്യം ഉപയോഗപ്പെടുത്താം. ഇത് ചെറുദൂര യാത്രക്കാര്ക്ക് ആശ്വാസമാകും. ഒഴിഞ്ഞുകിടക്കുന്ന സ്ലീപ്പര് ക്ലാസ് കോച്ചുകളെ ജനറല് കോച്ചുകളാക്കി ഓടിക്കാന് 2015-ല് റെയില്വേ സോണല് ജനറല് മാനേജര്മാര്ക്ക് അധികാരം നല്കിയിരുന്നു.
ജനറല് കോച്ചുകളിലെ തിരക്ക് കുറയ്ക്കാന് റെയില്വേ ചില കോച്ചുകള് ഡീ-റിസര്വ്ഡ് ആയി സംവരണം ചെയ്തത് ഇതിന്റെ ഭാഗമായിട്ടാണ്. സ്റ്റേഷനില് നിന്ന് പകല് തത്സമയം ടിക്കറ്റ് എടുക്കാം. പുതിയ കണക്ക് പ്രകാരം കേരളത്തില് 23 ട്രെയിനുകളില് മാത്രമാണ് ഡീ-റിസര്വ്ഡ് കോച്ച് അനുവദിച്ചത്.
