തൃശൂര്: മുത്രത്തിക്കരയില് അച്ഛനെ വെട്ടി പരിക്കേല്പ്പിച്ച ശേഷം വീടിന്റെ മുകളില് ഒളിച്ച മകനെ അഞ്ചുമണിക്കൂറിന് ശേഷം ഏറെ പണിപ്പെട്ട് താഴെയിറക്കി. ഇയാളെ പൊലീസ് കസ്റ്റഡിയിലെടുത്തു.
മുത്രത്തിക്കര ശിവക്ഷേത്രത്തിനുസമീപം വാടകയ്ക്കു താമസിക്കുന്ന മേക്കാടന് ശിവനെ(70)യാണ് മകന് വിഷ്ണു വെട്ടിയത്. കഴുത്തിന് വെട്ടേറ്റ ശിവനെ ഗുരുതരാവസ്ഥയില് തൃശൂര് മെഡിക്കല് കോളേജ് ആശുപത്രിയില് പ്രവേശിപ്പിച്ചു. ശനിയാഴ്ച ഉച്ചയ്ക്ക് ഒന്നരയോടെ ആയിരുന്നു സംഭവം. നാല്പത് ദിവസത്തോളമായി വിഷ്ണു വീട്ടില് തനിച്ചായിരുന്നു.
മകളുടെ വീട്ടിലായിരുന്ന ശിവന് ലൈഫ് പദ്ധതി പ്രകാരം വീട് ലഭിക്കുന്നതിന് പഞ്ചായത്തില് സമര്പ്പിക്കാന് വീടിനുള്ളില്നിന്ന് രേഖകള് എടുക്കാന് എത്തിയതായിരുന്നു. ഒപ്പം ഭാര്യ ലതികയും ഒരു ബന്ധുവുമുണ്ടായിരുന്നു. ഇവരെ വീടിനുള്ളിലേക്കു കടക്കാന് അനുവദിക്കാതിരുന്ന വിഷ്ണു, രേഖകള് കിണറ്റിലിട്ടതായി പറഞ്ഞു.
വസ്ത്രങ്ങളും രേഖകളും കിണറ്റില് കിടക്കുന്നതു കണ്ട് പ്രകോപിതനായ ശിവന് വിഷ്ണുവുമായി വാക്കേറ്റത്തിലേര്പ്പെട്ടു. തുടര്ന്നാണ് കൈയിലുണ്ടായിരുന്ന കൊടുവാളുകൊണ്ട് വിഷ്ണു ശിവനെ വെട്ടിയത്.നാലുതവണ വെട്ടിയ ശേഷം വിഷ്ണു അമ്മയെ വെട്ടാന് ശ്രമിച്ചെങ്കിലും കൂടെയുണ്ടായിരുന്ന ബന്ധു തടഞ്ഞു. ഇയാളാണ് പൊലീസിനെയും ആംബുലന്സും വിളിച്ചുവരുത്തിയത്.പിന്നാലെ വിഷ്ണു കത്തിയുമായി വീടിന്റെ മച്ചില് കയറിയിരുന്നു. ഓടുപൊളിച്ച് മച്ചിനുള്ളിലേക്കു കടക്കാന് പൊലീസ് തുനിഞ്ഞപ്പോഴൊക്കെ കടക്കുന്നവനെ കൊല്ലുമെന്നും ആത്മഹത്യചെയ്യുമെന്നും വിഷ്ണു ഭീഷണി മുഴക്കിയ
ഏറെനേരം അനുനയിപ്പിക്കാന് ശ്രമിച്ചിട്ടും വഴങ്ങാതായതോടെ പൊലീസും നാട്ടുകാരും ചേര്ന്ന് ഇയാളെ കീഴ്പ്പെടുത്താന് തീരുമാനിച്ചു. വീടിന്റെ തട്ടിന്റെ ജനലുകള് പൊളിച്ച പൊലീസ് അകത്തുകടക്കാന് ശ്രമിക്കുന്നതിനിടെ മച്ചിന്റെ വാതിലിലൂടെ വിഷ്ണു ഓടിനു മുകളിലേക്കു ചാടി. പിന്നെയും അനുനയ ശ്രമം തുടര്ന്നു.വൈകിട്ട് അഞ്ചരയോടെ വിഷ്ണു പൊലീസിന്റെ സമ്മര്ദത്തിനു വഴങ്ങി താഴെയിറങ്ങി.
വിഷ്ണു വീടിനുളളില് ആഭിചാരക്രിയകളും ചെയ്തുവന്നിരുന്നു. പൂജാകര്മങ്ങള് നടന്നിരുന്ന മുറിയില് കോഴി, മദ്യം എന്നിവയും വിവിധതരം ആയുധങ്ങളും പൊലീസ് കണ്ടെത്തി.
