തൃശൂര്: യുവതിയെ സമൂഹമാധ്യമങ്ങള് വഴി അപമാനിച്ച കേസില് അറസ്റ്റ് വാറണ്ടുമായെത്തിയ പൊലീസിനെ കണ്ട് യുവാവ് കുളത്തില് ചാടി. കൊടുങ്ങല്ലൂര് വടക്കന് വീട്ടില് ആഷിക്ക് (അച്ചു -34) ആണ് കുളത്തില് ചാടിയത്. തുടര്ന്ന് ഫയര്ഫോഴ്സിന്റെ സഹായത്തോടെ ആഷിഖിനെ അനുനയിപ്പിച്ച് കരക്ക് കയറ്റി അറസ്റ്റ് ചെയ്തു.
കേസില് വിചാരണക്ക് ഹാജരാകാതെ വന്നതോടെയാണ് കോടതി ജാമ്യമില്ലാ വാറണ്ട് പുറപ്പെടുവിച്ചത്. തുടര്ന്ന് പൊലീസ് തേടി വന്നപ്പോഴാണ് ഇയാള് കുളത്തില് ചാടിയത്. സോഷ്യല് മീഡിയ വഴി പരിചയപ്പെട്ട യുവതിയെ ബ്ളാക്ക് മെയില് ചെയ്ത് പണം തട്ടാനുള്ള ശ്രമം പരാജയപ്പെട്ടതോടെ സ്വകാര്യ ഫോട്ടോകളും വീഡിയോകളും പലര്ക്കായി അയച്ചുകൊടുക്കുകയായിരുന്നു. തുടര്ന്ന് യുവതി ഇരിങ്ങാലക്കുട സൈബര് പോലീസ് സ്റ്റേഷനില് പരാതി നല്കുകയായിരുന്നു. കേസില് വിചാരണ തുടങ്ങിയെങ്കിലും ഇയാള് കോടതിയില് ഹാജരായിരുന്നില്ല.
